আন্তঃৰাষ্ট্ৰীয় ক্ষেত্ৰত অসমক মর্যাদাপূর্ণ স্থান দিয়াৰ বাবে প্ৰধানমন্ত্ৰী মোদীক কৃতজ্ঞতা মুখ্যমন্ত্ৰীৰ

ডিজিটেল ডেস্ক: আন্তঃৰাষ্ট্ৰীয় কূটনীতিতো এতিয়া প্ৰৱেশ ঘটিছে অসমৰ সম্পদৰ। কেৱল প্ৰৱেশ ঘটাই নহয়, অসমৰ সম্পদে এতিয়া আন্তঃৰাষ্ট্ৰীয় কূটনৈতিক মঞ্চত উজলাই তুলিছে দেশৰ নাম, বৃদ্ধি কৰিছে দেশৰ গৌৰৱ। অসমৰ সম্পদৰ মান আৰু বিশ্বাসযোগ্যতা ইমানেই বৃদ্ধি পাইছে যে ইটালি ভ্রমণলৈ যোৱা দেশৰ প্ৰধানমন্ত্ৰী নৰেন্দ্ৰ মোদীয়ে ইটালিৰ প্রধানমন্ত্রী জর্জিয়া মেল'নিলৈ উপহাৰ হিচাপে লৈ গৈছিল অসমৰ এৰী চাদৰ। 

অসমৰ বয়ন শিল্পই আন্তঃৰাষ্ট্ৰীয় খ্যাতি আৰু বিশ্বাসযোগ্যতা লাভ কৰাই নিশ্চিতভাৱে অসমৰ শিপিনীৰ বাবে গৌৰৱ আৰু আনন্দৰ ক্ষণ হিচাপে পৰিগণিত হ'ব। সেইদৰে প্রধানমন্ত্রী মোদীয়ে খাদ্য আৰু কৃষি সংস্থাৰ সঞ্চালক প্রধান ড° কু ডং ইউলৈ উপহাৰ হিচাপে আগবঢ়াইছে অসমৰ মাটিৰ গোন্ধেৰে সংপৃক্ত জহা চাউল। অসমৰ শিল্প-সংস্কৃতি আৰু ঐতিহ্যক আন্তঃৰাষ্ট্ৰীয় ক্ষেত্ৰত মর্যাদাপূর্ণ স্থান দিয়াৰ বাবে প্ৰধানমন্ত্ৰীৰ এনে প্রচেষ্টাক ধন্যবাদ আৰু কৃতজ্ঞতা জনাই মুখ্যমন্ত্রী ড° হিমন্ত বিশ্ব শর্মাই কয় যে বয়ন শিল্পৰ ক্ষেত্ৰত শান্তিৰ প্ৰতীক হিচাপে পৰিচিত এৰী হৈছে অসমৰ আস্থা, সংস্কৃতি আৰু স্বকীয়তাৰ এক উজ্জ্বল প্রতিচ্ছবি। 

এই প্রসংগতে উল্লেখযোগ্য যে প্রধানমন্ত্রী নৰেন্দ্ৰ মোদীয়ে অসমৰ বয়ন শিল্প, অসমৰ প্ৰকৃতি আৰু অসমৰ খেতিয়কৰ ঘামেৰে সংপৃক্ত কৃষিজাত সামগ্রীক সদায়েই বিশেষ অগ্রাধিকাৰ দি আহিছে।

উৎস: দৈনিক জনমভূমি