ডিজিটেল ডেস্ক: উত্তৰ প্ৰদেশ৷ দেশৰ সৰ্ববৃহৎ ৰাজ্যখনক দেশৰ ৰাজনীতিৰ অভিকেন্দ্ৰ বুলি ক’লেও অত্যুক্তি কৰা নহ’ব৷ ৮০খন লোকসভা আসনেৰে উত্তৰ প্ৰদেশে দেশৰ ৰাজনীতিত গ্ৰহণ কৰি আহিছে গুৰুত্বপূৰ্ণ ভূমিকা৷ ৰাজ্যখনৰ বৃহৎসংখ্যক লোকসভা আসনৰ হিচাপ-নিকাচেই নিৰ্ণয় কৰে কেন্দ্ৰৰ মছনদত বহিব কোন? আৰু সেইবাবেই বিজেপি-কংগ্ৰেছ উভয়ৰে চকু উত্তৰ প্ৰদেশৰ ৮০খন লোকসভা আসনত৷
পিছে ৰাজনৈতিকভাৱে গুৰুত্বপূৰ্ণ উত্তৰ প্ৰদেশৰ আৰ্থ-সামাজিক পৰিস্থিতি কেনেধৰণৰ? ৰাজ্যখনৰ মৌলিক সমস্যা সমাধানত কিমান সফল মুখ্যমন্ত্ৰী যোগী আদিত্যনাথ?
নিবনুৱা সমস্যাৰে ভাৰাক্ৰান্ত উত্তৰ প্ৰদেশো৷ একেদৰে, স্বাস্থ্য আৰু শিক্ষাখণ্ডতো নাই চকুতলগা সফলতা৷ ২০২৩ চনত ভাৰতৰ ভিতৰত সৰ্বাধিক নিয়োগযোগ্যতা আছিল উত্তৰ প্ৰদেশতে৷ নিযুক্তিৰ বাবে যোগ্য স্নাতকৰ সংখ্যাই আছিল৷ এই হাৰ আছিল ৭২.৫ শতাংশতকৈ অধিক। ২০১৭-১৮ বৰ্ষত উত্তৰ প্ৰদেশত নিবনুৱাৰ হাৰ আছিল ৬.৪ শতাংশ, যি ২০২২-২৩ বৰ্ষত ২.৬ শতাংশলৈ হ্ৰাস পাইছিল৷ অৱশ্যে, চৰকাৰৰ প্ৰচেষ্টাৰ ফলত ৰাজ্যখনত ব্যক্তিগত খণ্ডত বিনিয়োগ বৃদ্ধি পাইছে আৰু নতুন চাকৰিৰ সুযোগ সৃষ্টি হৈছে৷ যাৰ ফলত ২০১৭-১৮ বৰ্ষৰ তুলনাত ২০২২-২৩ বৰ্ষত উত্তৰ প্ৰদেশত নিবনুৱাৰ হাৰ ৩.৮ শতাংশ হ্ৰাস পাইছে বুলি চৰকাৰী বিবৃতিত কোৱা হৈছে।
আনহাতে, ৰাজ্যখনত প্ৰাথমিক শিক্ষাৰ ছবিখন উদ্বেগজনক৷ মুখ্যমন্ত্ৰী যোগী আদিত্যনাথে ৰাজ্যখনত ডাবল ইঞ্জিনৰ চৰকাৰৰ জৰিয়তে উন্নয়নৰ গংগা বোৱা বুলি দাবী কৰাৰ বিপৰীতে তথ্যই উন্মোচিত কৰিছে এখন ভয়ংকৰ ছবি৷
শিক্ষাৰ পোহৰ নেদেখাকৈ শৈশৱ অতিবাহিত কৰিছে উত্তৰ প্ৰদেশৰ বৃহৎসংখ্যক শিশুৱে৷ ৰাজ্যখনত ৩.৯৬ লাখ শিশুৱে লাভ কৰা নাই বিদ্যালয়ৰ শিক্ষা৷ এই তথ্যই এতিয়া বিব্ৰত কৰি তুলিছে ৰাজ্য চৰকাৰখনক৷ প্ৰাথমিক স্তৰৰ শিক্ষা ব্যৱস্থা উন্নত কৰাত মুখ্যমন্ত্ৰী আদিত্যনাথ ব্যৰ্থ হোৱাৰ অভিযোগ তুলিছে বিৰোধীয়ে৷ উত্তৰ প্ৰদেশৰ পাছতে এই স্থানত আছে বিহাৰ৷ বিহাৰত ১.৩৪ লাখ আৰু গুজৰাটত ১.০৬ লাখ শিশু আছে বিদ্যালয়ৰ বাহিৰত৷
অকল ইমানে নহয়, নৱজাতকৰ মৃত্যুও ৰাজ্যখনৰ বাবে আন এটা হতাশজনক দিশ৷ নৱজাতকৰ মৃত্যু ৰোধ কৰাত সমূলি ব্যৰ্থ যোগী নেতৃত্বাধীন উত্তৰ প্ৰদেশ চৰকাৰৰ স্বাস্থ্য বিভাগ৷ ২০২০ চনত উত্তৰ প্ৰদেশ ৰাজ্যত প্ৰতি ১,০০০ নৱজাতকৰ বিপৰীতে মৃত্যু হৈছিল ৩৮জনৰ৷ উল্লেখযোগ্য যে প্ৰতি ১,০০০ জীৱিত জন্মত এবছৰৰ তলৰ শিশুৰ মৃত্যুৰ সংখ্যাৰ দ্বাৰা নৱজাতকৰ মৃত্যুৰ হাৰ নিৰূপণ কৰা হয়।
Continue Reading
