উত্তৰ প্ৰদেশত বিজেপিৰ ‘মকৰ-ধ্বজ’ ওৱেইছী: ধৰ্মীয় মেৰুকৰণেই শেষ ভৰসা !

ডিজিটেল ডেস্ক : উত্তৰ প্ৰদেশৰ বিধানসভা নিৰ্বাচনৰ প্ৰাকমুহূৰ্তত ৰাজ্যখনৰ কেইবাগৰাকীও বিজেপি মন্ত্ৰী আৰু বিধায়কে দলত্যাগ কৰি সমাজবাদী পাৰ্টীত যোগদান কৰিছিল৷ দেশৰ ৰাজনীতিত খলকনিৰ সৃষ্টি কৰি যোগী আদিত্যনাথৰ সংগ এৰিছিল ইজনৰ পিছত সিজন নেতাই৷ মুখ্যমন্ত্ৰী যোগী আদিত্যনাথ মুখ্যমন্ত্ৰী হিচাপে ব্যৰ্থ হোৱাৰ অভিযোগ তুলি নিজ দলৰে সতীৰ্থই বিজেপি ত্যাগ কৰিছিল৷ ধৰ্মীয় গোড়ামি আৰু উগ্ৰ সাম্প্ৰদায়িকতাবাদেৰে উত্তৰ প্ৰদেশত ঘৃণা আৰু হিংসাৰ ৰাজনীতি কৰা বুলি অভিযোগ থকা যোগী আদিত্যনাথ পুনৰ এবাৰ মুখ্যমন্ত্ৰী হোৱাৰ সম্ভাৱনা নাই বুলিও চৰ্চা চলিছে৷   ৰাজনৈতিক বিশ্লেষকসকলেও, উত্তৰ প্ৰদেশত পুনৰ এবাৰ বিজেপিয়ে চৰকাৰ গঠন কৰাৰ সম্ভাৱনা ব্যক্ত কৰা নাই৷ বিভিন্ন নিৰ্বাচনী সমীক্ষায়ো উত্তৰ প্ৰদেশত সমাজবাদী পাৰ্টীৰ চৰকাৰ গঠনৰ সম্ভাৱনাক প্ৰকাশ কৰিছে৷ এনে পৰিস্থিতিত হঠাতে উত্তৰ প্ৰদেশৰ ৰাজনীতিত আৱিৰ্ভাৱ ঘটিল আছাদুদ্দিন ওৱেইছীৰ৷ হায়দৰাবাদ সমষ্টিৰ লোকসভা সমষ্টিৰ সাংসদ তথা এআইএমইআমএম-ৰ মুৰব্বী ওৱেইছীয়ে নিৰ্বাচনী প্ৰচাৰ চলাবলৈ উত্তৰ প্ৰদেশত উপস্থিত হৈছিল৷ নিজকে ধৰ্মীয় সংখ্যালঘুৰ ত্ৰাণকৰ্তাৰূপে প্ৰতিষ্ঠা কৰিব খোজা এইগৰাকী নেতাৰ আছে সাম্প্ৰদায়িক ৰাজনীতিৰ ঘৃণনীয় ইতিহাস৷   ইতিমধ্যে, কেইবাবাৰো ধৰ্মীয় সাম্প্ৰদায়িক মন্তব্যৰে দেশত বিতৰ্কৰ সৃষ্টি কৰিছিল ওৱেইছীয়ে৷ কালিও নিৰ্বাচনী সভাত হিন্দু ধৰ্মীয় লোকক উদ্দেশ্যি কটু মন্তব্য কৰিছিল ওৱেইছীয়ে৷ তাৰ পাছতে উত্তৰ প্ৰদেশত সৃষ্টি হৈছিল প্ৰতিক্ৰিয়াৰ৷ শিক্ষা, স্বাস্থ্য, উন্নয়নৰ মাপকাঠীৰে নিৰ্বাচনী ৰণত নামিব নোৱৰা উত্তৰ প্ৰদেশ চৰকাৰৰ বাবে এতিয়া আছাদুদ্দিন ওৱেইছী হৈ পৰিছে শেষ ভাৰসা৷ যেন মৃত্যুৰ সময়ৰ মকৰ-ধ্বজ৷ ওৱেইছিৰ মুখেৰে ঘৃণা বিয়পাই ধৰ্মীয় মেৰুকৰণেৰে হিন্দু ভোটবেংক সুৰক্ষিত কৰিব বিচৰা হৈছে উত্তৰ প্ৰদেশত৷ হিন্দুত্বৰ ৰাজনীতিৰে দেশজুৰি চৰ্চিত আদিত্যনাথে সেয়ে শেষ আশ্ৰয় হিচাপে ওৱেইছীকে সাৰথি কৰি লোৱা বুলি বহুজনে মন্তব্য কৰিছে৷   উল্লেখযোগ্য যে, উত্তৰ প্ৰদেশৰ বিধানসভা নিৰ্বাচনৰ বাবে নিৰ্বাচনী প্ৰচাৰ সামৰি মিৰাটৰ পৰা দিল্লীলৈ উভতি গৈ থকাৰ সময়তে কালি অল ইণ্ডিয়া মজলিস-ই-ইত্তেহাদুল মুছলীমিন (এআইএমআইএম)ৰ সভাপতি তথা হায়দৰাবাদ লোকসভা সমষ্টিৰ সাংসদ আছাদুদ্দিন ওৱেইছীৰ কনভয়ৰ ওপৰত গুলীচালনাৰ অভিযোগত দুজন লোকক আৰক্ষীয়ে গ্ৰেপ্তাৰ কৰিছে৷ আৰক্ষী অধীক্ষক ভূকাৰে সদৰি কৰামতে, ওৱেইচছিৰ হিন্দুবিৰোধী মন্তব্যৰ বাবে অভিযুক্তসকল ক্ষুব্ধ হৈ পৰিছিল৷ ইপিনে, কালিৰ গুলীচালনাৰ ঘটনাৰ পাছতে আজি আছাদুদ্দিন ওৱেইছিলৈ কেন্দ্ৰই ‘জেড’পৰ্যায়ৰ নিৰাপত্তা প্ৰদান কৰাৰ সিদ্ধান্ত লৈছে৷