ডিজিটেল ডেস্কঃ ভাৰতৰ বিৰুদ্ধে দ্বিতীয়খন টেষ্টৰ পূৰ্বে ৱেষ্ট ইণ্ডিজ দলৰ পৰিৱৰ্তন ঘটিছে। স্পিনাৰ অলৰাউণ্ডাৰ কেভিন চিনক্লেয়াৰক লোৱা হৈছে। বৃহস্পতিবাৰৰ পৰা আৰম্ভ হ’ব দ্বিতীয়খন টেষ্ট৷
ৱেষ্ট ইণ্ডিজৰ হৈ ৭খন এদিনীয়া আৰু ৬টা টি-২০ মেচ খেলিলেও চিনক্লেয়াৰে এতিয়াও টেষ্ট খেলা পৰা নাই। ডমিনিকা টেষ্টৰ পিছত ৱেষ্ট ইণ্ডিজে এই ২৩ বছৰীয়া অল ৰাউণ্ডাৰক দলত লয়। বাংলাদেশ এ বনাম ৱেষ্ট ইণ্ডিজ এ ছিৰিজৰ দৃষ্টি আকৰ্ষণ কৰিছিল চিনক্লেয়াৰে। সেই শৃংখলাত তেওঁ সৰ্বাধিক উইকেট দখল কৰিছিল। বিশ্বকাপৰ কোৱালিফাইং দলতো আছিল চিনক্লেয়াৰ। কিন্তু জিম্বাবুৱেত যোগ্যতা অৰ্জন কৰিবলৈ সক্ষম নহ’ল দলটোৱে।
দলত আছে ৰাহকিম কৰ্ণৱালো। প্ৰথম টেষ্টৰ সময়ত তেওঁৰ হৃদযন্ত্ৰৰ সমস্যা হৈছিল। দ্বিতীয় টেষ্টত পিটচ কেনেকুৱা হ’ব তাৰ ওপৰত গুৰুত্ব দিয়া হৈছে। প্ৰথম টেষ্টত সহায় লাভ কৰিছিল স্পিনাৰসকলে। অকলেই ৰবিচন্দ্ৰন অশ্বিনে ১২টা উইকেট দখল কৰে। ৰবীন্দ্ৰ জাদেজাই ৫টা উইকেট দখল কৰে। ভাৰতৰ দুয়োগৰাকী স্পিনাৰে ৱেষ্ট ইণ্ডিজক তিনিদিনতে পৰাস্ত কৰে৷
বৃহস্পতিবাৰৰ পৰা আৰম্ভ হ’বলগীয়া খেলখন ভাৰত আৰু ৱেষ্ট ইণ্ডিজৰ মাজত ১০০ সংখ্যক টেষ্ট অনুষ্ঠিত হ’ব। এইখন বিৰাট কোহলীৰ ৫০০ সংখ্যক আন্তঃৰাষ্ট্ৰীয় মেচ।
ঘোষিত ৱেষ্ট ইণ্ডিজ দলটো : ক্ৰেগ ব্ৰেইথৱেইট (অধিনায়ক), জেৰমেইন ব্লেকউড, এলেক এথানেজ, ট্যাগানাৰিন চন্দ্ৰপল, ৰাহকিম কৰ্ণৱাল, জোছুয়া দা চিলভা, শ্বেনন গেব্ৰিয়েল, জেছন হোল্ডাৰ, আলজেৰী জোচেফ, কাৰ্ক মেকেঞ্জী, কেভিন চিনক্লেয়াৰ, কেমাৰ ৰ’চ আৰু জোমেল ৱাৰিকান।
Continue Reading
