ডিজিটেল ডেস্কঃ ভাৰতলৈ আহি এবিধ নতুন খাদ্য খালে জাপানৰ প্ৰধানমন্ত্ৰীয়ে৷ ভাৰতীয় লোকৰ প্ৰিয় খাদ্য ফুচকা খাই টকালি পাৰিলে জাপানৰ প্ৰধানমন্ত্ৰীগৰাকীয়ে৷ জাপানৰ প্ৰধানমন্ত্ৰী ফুমিও কিছিদাই ফুচকা দেখাৰ লগে লগে এয়া কি বুলি প্ৰশ্ন কৰে৷ প্ৰধানমন্ত্ৰী মোদীয়ে কিছিদাক ফুচকাৰ সোৱাদ লোৱাৰ সুবিধা কৰি দিয়ে৷ উল্লেখ্য দুদিনীয়া ভাৰত ভ্ৰমণকালত তেওঁ ভাৰতীয় খাদ্যৰ সোৱাদ লৈ ফুৰিছে।
কিছিদাই ফুচকা খোৱাৰ এটা ভিডিঅ' ভাইৰেল হৈ পৰিছে। ভিডিঅ'টো শ্বেয়াৰ কৰি নাগালেণ্ডৰ মন্ত্ৰী টেমজেম ইম্মা আলঙে কয় যে জাপানৰ প্ৰধানমন্ত্ৰীয়েও ফুচকাৰ লোভ সামৰিব নোৱাৰিলে৷
জাপানৰ প্ৰধানমন্ত্ৰী ফুমিও কিছিদাই সোমবাৰে ভাৰতত উপস্থিত হৈছে। তেওঁ নতুন দিল্লীত প্ৰধানমন্ত্ৰী নৰেন্দ্ৰ মোদীৰ সৈতে দ্বিপাক্ষিক বৈঠকত মিলিত হয়। ইয়াৰ পিছত দুয়োগৰাকী ৰাষ্ট্ৰপ্ৰধানে দিল্লীৰ বুদ্ধ জয়ন্তী উদ্যানত উপস্থিত হয়। তাত কিছিদাই ভাৰতীয় খাদ্যৰ জুতি লয়।
বিভিন্ন প্ৰকাৰৰ খাদ্য যেনে ফুচকা, আম পান্না, লাচী পৰিৱেশন কৰা হয়।জাপানৰ প্ৰধানমন্ত্ৰীৰ ফুচকা খোৱাৰ দৃশ্য নেটিজেনসকলৰ মাজত জনপ্ৰিয় হৈ পৰিছে। ভিডিঅ'টোত জাপানৰ প্ৰধানমন্ত্ৰীক টেঙা পানীৰে তিনিটা ফুচকা খাই থকা দেখা গৈছে। তেওঁ ভাৰতীয় খাদ্য ভালপায় বুলি অনুভৱ কৰি মোদীয়ে তেওঁক আৰু কেইটামান ফুচকা দিবলৈ কৈছিল।ভিডিঅ'টো নাগালেণ্ডৰ বিজেপি চৰকাৰৰ এজন মন্ত্ৰী টেমজেনে শ্বেয়াৰ কৰিছে। তেওঁ টুইটত লিখিছে, "আনকি জাপানৰ প্ৰধানমন্ত্ৰীয়েও ভাৰতৰ জনপ্ৰিয় ফুচকা খোৱাৰ লোভ চম্ভালিব নোৱাৰে।’’
Continue Reading
