ভোটদান নকৰিলে বেংক একাউণ্টৰ পৰা কাটিব ৩৫০ টকা! সত্যতা কি?

ডিজিটেল ডেস্ক: ভোটাধিকাৰ ভাৰতীয় নাগৰিকৰ এক সাংবিধানিক অধিকাৰ। নাগৰিকত্ব অৰ্জন কৰা প্ৰতিজন লোকেই ভোটদান কৰিব লাগে। জনসাধাৰণক ভোটদানৰ বাবে উদ্বুদ্ধ কৰিবলৈ সময়ে সময়ে আয়োজিত হৈ আহিছে সজাগতা অভিযান। নিৰ্বাচন আহিলেই প্ৰাৰ্থী উবুৰি খাই পৰে ভোটভিক্ষা কৰি। ভোটৰ বাবে চলে বিভিন্ন উপঢৌকনৰ ৰাজনীতি। এইবাৰ ভোটদান নকৰিলে বেঃক একাউণ্টৰ পৰা ৩৫০ টকা কাটিব বুলি ওলোৱা এক বাতৰিয়ে চকু কপালত তুলিছে সাধাৰণ জনতাৰ।

এখন হিন্দী সংবাদ পত্ৰিকাত 'ভোটদান নকৰিলে বেংক একাউণ্টৰ পৰা কাটিব ৩৫০ টকা' শীৰ্ষক বাতৰি প্ৰকাশ হোৱাৰ পাছতে ছ’চিয়েল মিডিয়াত ভাইৰেল হৈ পৰিছিল খবৰটো। লগে লগে ভোটাৰ ৰাইজৰ মাজত সৃষ্টি হয় প্ৰতিক্ৰিয়াৰ। বিষয়টো নিৰ্বাচন আয়োগৰ দৃষ্টিগোচৰ হোৱাতহে ওলাই পৰে ওৰহি গছৰ ওৰ। ঘটনা সন্দৰ্ভত পঞ্জাবৰ ৰাজ্যিক নিৰ্বাচন আয়োগে এক স্পষ্টিকৰণ দিয়ে। প্ৰকৃততে হিন্দী সংবাদ পত্ৰিকাখনে প্ৰচাৰ কৰা বাতৰিটো ভুৱা। পঞ্জাবৰ মুখ্য ৰাজ্যিক নিৰ্বাচনী কাৰ্যালয়ৰ এগৰাকী মুখপাত্ৰই কয় যে, তেওঁলোকে বিগত কিছুদিনৰ পৰা সামাজিক মাধ্যমত প্ৰচাৰ হৈ থকা বাতৰিটো সন্দৰ্ভত অনুসন্ধান চলায় আৰু বাতৰিটো সম্পূৰ্ণ ভিত্তিহীন।

মুখপাত্ৰগৰাকীয়ে লগতে ৰাজ্যখনৰ জনসাধাৰণক ছ’চিয়েল মিডিয়াত এনেকুৱাধৰণৰ বিপথে পৰিচালিত কৰা কিবা খবৰ পালে ভাৰতৰ নিৰ্বাচন আয়োগ আৰু পঞ্জাব নিৰ্বাচন আয়োগক অৱগত কৰিবলৈও আহ্বান জনায়।