ডিজিটেল ডেস্কঃ আপোনাৰ WhatsApp তো আহিছে নেকি 'M PARIVAHAN' নামৰ মোবাইল App। যদি আহিছে তেন্তে সাৱধান হওঁক আপুনিও । নহ'লে ১ মিনিটতে আপোনাৰ বেংক একাউণ্ট, ফেচবুক, Whatsapp, Instagram আদি সকলো হেকাৰৰ কবলত পৰিব।
ধিঙৰ টুকটুকীত সংঘটিত হৈছে এনে এক ভয়ংকৰ চাইবাৰ অপৰাধজনিত ঘটনা । টুকটুকীৰ এজন যুৱ ব্যৱসায়ীৰ লগত সংঘটিত হৈছে এই ভয়ংকৰ ঘটনাটো ।
টুকটুকীৰ যুৱ ব্যৱসায়ী মুজাহিদুল আলমৰ WhatsAppত এম পৰিবহন নামৰ এটা মোবাইল এপচ প্ৰেৰণ কৰিছিল জুৰীয়াৰ শিঙ্গাৰীৰ ওৱাছিম আক্ৰাম নামৰ এটা প্ৰৱঞ্চকে।
য'ত লিখা আছিল " এই আবেদনত আপুনি মাত্ৰ এক টকা দি সকলো গাড়ীৰ মুলতবি চালান পৰিশোধ কৰিব পাৰিব ।
যুৱকজনে App টো ইনষ্টল কৰাৰ লগে লগেই ওলাই পৰিল এই প্ৰৱঞ্চনামূলক অফাৰৰ আচল কাহিনী ।
ব্যৱসায়ী মুজাহিদুল আলমৰ বেংক একাউণ্টৰ পৰা চাইবাৰ অপৰাধী চক্ৰটোৱে কেইবাবাৰো কাটি নিলে বৃহৎ পৰিমাণৰ ধন।
অচল হৈ পৰিছে ব্যৱসায়িক মুজাহিদুল আলমৰ আন কেইবাটাও বেংক একাউণ্ট ।
অকল এয়াই নহয়, মুজাহিদুল আলমৰ ফেচবুক, Whatsapp, Instagram আদি সকলো এতিয়া হেকাৰৰ কবলত আছে ।
ইফালে, সমগ্ৰ বিষয়টো আৰক্ষীক নজনাবলৈ প্ৰৱঞ্চকটোৱে ফোনযোগে মৃত্যুৰ ভাবুকি দিয়ে ব্যৱসায়ী মুজাহিদুল আলমক।
অৱশেষত উপায়হীন হৈ মুজাহিদুল আলমে অনলাইনৰ জৰিয়তে জুৰীয়াৰ শিঙ্গাৰীৰ প্ৰৱঞ্চকৰূপী এইজন যুৱক ৱাচিম আক্ৰামৰ বিৰুদ্ধে চাইবাৰ চেলত দাখিল কৰিছে অভিযোগ ।
এই অভিযোগৰ ভিত্তিত যোৱা নিশা ধিঙৰ আহোমগাঁও আৰক্ষীয়ে আটক কৰিছে ৱাচিম আক্ৰামক।
বৰ্তমান আৰক্ষীয়ে অধিক তথ্যৰ বাবে জেৰা অব্যাহত ৰাখিছে প্ৰৱঞ্চক ৱাচিম আক্ৰামক ।
Continue Reading
