নিশা ১ৰ পৰা ৩ বজাৰ ভিতৰত সদায় প্ৰস্ৰাৱ লগাটো নহয় স্বাভাৱিক

ডিজিটেল ডেস্ক: বহুতৰে ৰাতি সঘনাই সাৰ পাই প্ৰস্ৰাৱ কৰাৰ অভ্যাস আছে। আমি এই কথাটো স্বাভাৱিক বুলি ভাবি প্ৰায়ে আওকাণ কৰো, কিন্তু সঁচাকৈয়ে ই স্বাভাৱিক নেকি? ৰাতি সাৰ পাই প্ৰস্ৰাৱ কৰাটো স্বাভাৱিক নহয়। বিশেষকৈ যদি আপুনি নিশা ১ৰ পৰা ৩ বজাৰ ভিতৰত প্ৰস্ৰাৱ লগাৰ বাবে সাৰ পায় তেন্তে ই একেবাৰেই স্বাভাৱিক নহয়; ই আপোনাৰ শৰীৰৰ ভিতৰত হোৱা পৰিৱৰ্তনৰ লক্ষণ হ’ব পাৰে। 

যদি আপুনি প্ৰতিদিনে নিশা ১ৰ পৰা ৩ বজাৰ ভিতৰত সাৰ পায়, তেন্তে ইয়াক আওকাণ কৰাৰ পৰিৱৰ্তে আপোনাৰ শৰীৰৰ লক্ষণসমূহ বুজিবলৈ চেষ্টা কৰক আৰু ইয়াক উপশম কৰাৰ পদক্ষেপ লওক। 

নিশা ১ৰ পৰা ৩ বজাৰ ভিতৰৰ সময় বিশেষ

আয়ুৰ্বেদৰ মতে নিশা ১ বজাৰ পৰা ৩ বজাৰ মাজৰ সময়খিনি লিভাৰৰ বাবে অতি গুৰুত্বপূৰ্ণ বুলি গণ্য কৰা হয়। এই সময়ছোৱাত শৰীৰে নিজকে ডিটক্স কৰাৰ প্ৰক্ৰিয়াত থাকে। গতিকে এই সময়ত যদি কোনো ব্যক্তি সঘনাই সাৰ পায়, তেন্তে ই লিভাৰত চাপ বৃদ্ধি পোৱাৰ লক্ষণ হ’ব পাৰে বা শৰীৰক জিৰণি লোৱাৰ প্ৰয়োজন হোৱাৰ লক্ষণ হ’ব পাৰে। লিভাৰত চাপ বৃদ্ধি পালে সমগ্ৰ স্বাস্থ্যৰ বাবেই হানিকাৰক। 

এই সমস্যাৰ কাৰণ কি?

পুষ্টিবিদসকলৰ মতে ৰাতিপুৱা ১ৰ পৰা ৩ বজাৰ ভিতৰত সাৰ পালে ইয়াৰ কেইবাটাও কাৰণ থাকিব পাৰে। যেনে, গোটেই দিনটো বেছিকৈ চাহ বা কফি খালে ইয়াত থকা কেফেইনেও ৰাতি সঘনাই প্ৰস্ৰাৱ কৰা অৱস্থাৰ সৃষ্টি কৰে। তদুপৰি অধিক পৰিমাণে নিমখ সেৱন কৰিলেও শৰীৰৰ ভাৰসাম্যতাত প্ৰভাৱ পৰিব পাৰে। বিশেষকৈ মহিলাৰ ৰজোনিবৃত্তিৰ সময়ত হৰম’নৰ পৰিৱৰ্তনেও এই সমস্যাৰ সৃষ্টি কৰিব পাৰে।

এই সমস্যাৰ পৰা কেনেকৈ মুক্তি পাব পাৰি

ৰাতি শোৱাৰ আগতে ভৰি দুখন নিমখ মিহলি কৰা কুহুমীয়া পানীত কিছু সময় তিয়াই থ’ব লাগে। ইয়াৰ ফলত স্নায়ুতন্ত্ৰ শিথিল হয় আৰু শৰীৰ শান্ত হয়। আন এটা সমাধান হ’ল এচামুচ ধনীয়াৰ বীজ আৰু এচামুচ চফ ১০০মিলিলিটাৰ পানীত উতলাই তাৰ পিছত এই পানী খাব লাগে। ইয়াৰ দ্বাৰা শৰীৰৰ ভাৰসাম্য বজাই ৰখাতো সহায় হয়। শৰীৰ শান্ত আৰু হৰম’নৰ ভাৰসাম্য ৰক্ষাৰ বাবে নিয়মীয়াকৈ ভ্ৰামাৰি প্ৰাণায়াম অনুশীলন কৰিলেও সুফল পোৱা যায়।