ডিজিটেল ডেস্কঃ যৌন ভিডিঅ’ টেপৰ দ্বাৰা দুষ্ট চক্ৰই বহতকে ফান্দত পেলাই ধন লুটি আহিছে। শেহতীয়াকৈ তেনে এক ঘটনাই পোহৰলৈ আহিছে গুজৰাটত। যৌন ভিডিঅ’ টেপ চক্ৰৰ ফান্দত পৰি গুজৰাটৰ ব্যৱসায়ী এজনে ২.৬৯ কোটি টকা হেৰুওৱাৰ ঘটনাই এতিয়া আলোড়ণৰ সৃষ্টি কৰিছে।
আৰক্ষী প্ৰকাশ কৰা অনুসৰি এক নৱীকৰণযোগ্য শক্তি প্ৰতিষ্ঠানৰ মালিক সেই ভুক্তভোগী ব্যৱসায়ীজনলৈ যোৱা বছৰৰ ৮ আগষ্টত এগৰাকী মহিলাৰ পৰা এটা ফোন আহিছিল। মহিলাগৰাকীয়ে যিয়ে নিজকে মৰবি এলেকাৰ ৰিয়া শৰ্মা বুলি পৰিচয় দিছিল।
মহিলাগৰাকীয়ে ব্যৱসায়ীজনক ভিডিঅ' কলৰ সময়ত কাপোৰ খুলিবলৈ বাধ্য কৰিছিল। তাৰ পিছতে মহিসাগৰাকীয়ে হঠাতে কলটো কাটি দিছিল আৰু ভুক্তভোগীজনক ৫০,০০০ টকা দাবী কৰিছিল। সেই ধন আদায় নিদিলে ব্যৱসায়ীজনৰ নগ্ন ভিডিঅ' ক্লিপটো বিয়পাই দিয়া হ’ব বুলি ভাবুকি দিছিল। ফলত ব্যৱসায়ী জনে ৫০ হাজাৰ টকা আদায় দিছিল।
আৰক্ষীয়ে প্ৰকাশ কৰা মতে "কিছুদিন পিছত ভুক্তভোগীজনে আন এজন ব্যক্তিৰ পৰা ফোন পাইছিল, যিয়ে নিজকে দিল্লী আৰক্ষীৰ পৰিদৰ্শক গুড্ডু শৰ্মা বুলি পৰিচয় দিছিল। ভিডিঅ' ক্লিপটো তেওঁৰলগত আছে বুলি দাবী কৰি তেওঁ ৩ লাখ টকা লোকজনৰ পৰা আদায় কৰিছিল। একে বছৰৰে ১৪ আগষ্টতনিজকে দিল্লী আৰক্ষীৰ চাইবাৰ চেলৰ কৰ্মচাৰী হিচাপে পৰিচয় দিয়া আন এজন ব্যক্তিয়ে মহিলাগৰাকীয়ে আত্মহত্যাৰ চেষ্টা কৰা বুলি দাবী কৰি ৮০.৯৭ লাখ টকা ব্যৱসায়ীজনৰ পৰা আদায় কৰি লয়।
পিছত ব্যৱসায়ীজনে চিবিআইৰ এজন ভুৱা বিষয়াৰ পৰা ফোন পাইছিল । যিয়ে মহিলাগৰাকীৰ মাতৃয়ে কেন্দ্ৰীয় তদন্ত সংস্থাৰ কাষ চাপিছে বুলি দাবী কৰি গোচৰটো নিষ্পত্তি কৰিবলৈ ৮.৫ লাখ টকা বিচাৰিছিল। ভয়তে ব্যৱসায়ী জনে সেই ধনো আদায় দিয়ে। এনেদৰে ২.৬৯ কোটি টকা আদায় দি হতাশ হৈ পৰা ব্যৱসায়ী জনে শেষত সাহস গোটাই আৰক্ষীৰ কাষ চাপে। আৰক্ষীৰ তদন্তত ওলাই পৰে যে ব্যৱসায়ী জনক এটা চক্ৰই ব্লেকমেইলিং কৰি আহিছে।
এই বছৰৰ ১০ জানুৱাৰীত চাইবাৰ অপৰাধ শাখাৰ আৰক্ষী থানাই ১১ জন ব্যক্তিৰ বিৰুদ্ধে অভিযোগ লিপিবদ্ধ কৰে। এজাহাৰত ভাৰতীয় দণ্ডবিধিৰ ধাৰা ৩৮৭ (ধন দাবী), ১৭০ (ৰাজহুৱা কৰ্মচাৰী হিচাপে ছদ্মবেশ), ৪৬৫ (জালিয়াতি) ৪২০ (প্ৰৱঞ্চনা), আৰু ১২০-বি (অপৰাধমূলক ষড়যন্ত্ৰ)ৰ অধীনত গোচৰ ৰুজু কৰা হৈছে । এই গোচৰটোত এতিয়ালৈকে কাকো গ্ৰেপ্তাৰ কৰা হোৱা নাই আৰু তদন্ত চলি আছে বুলি আৰক্ষীয়ে প্ৰকাশ কৰে।
Continue Reading
