সোণাপুৰৰ জুবিনৰ সমাধিথলীত আজিও অব্যাহত আছে জনস্ৰোত

ডিজিটেল ডেস্কঃ জুবিন নাই, কোনেও মানি ল'ব পৰা নাই এই কঠোৰ সত্যক। কায়িক দেহা এৰি কালি পঞ্চভূতত বিলীন হ'ল জুবিন গাৰ্গ। লাখ লাখ জনতাই জনালে শেষ বিদায়। 

চিতাগ্নি শেষ হোৱাৰ পাছতো নিশা জুবিনৰ সমাধিৰ কাষত বহি থাকিল অলেখ অনুৰাগী। সোণাপুৰৰ কমাৰকুছিত জুবিন গাৰ্গৰ জ্বলি যোৱা চিতাৰ কাষত নিশা অনুৰাগীয়ে আৱেগেৰে গালে মায়াবিনী। চৌপাশ কঁপাই ভাঁহি আহিল জয় জুবিন দা ধ্বনি। কোনেও বিদায় জনাব পৰা নাই প্ৰাণৰ আপোন শিল্পীক। 

বুধবাৰে পুৱাও কমাৰকুছিলৈ জুবিনক শেষ শ্ৰদ্ধা জনাবলৈ আহিল বহুলোক। চিতাৰ কাষত তেওঁৰ সান্নিধ্য বিচাৰি আজিও অপেক্ষাৰত বহু অনুৰাগী। ৰাজ্যৰ ভিন্ন প্ৰান্তৰ পৰা এতিয়াও অব্যাহত আছে জনস্ৰোত। আটায়ে সোঁৱৰণ কৰিলে প্ৰাণৰ শিল্পীগৰাকীক। সমাধিথলীলৈ আহি উচুপি উঠিল অজস্ৰ অনুৰাগী। 

বিয়লিলৈ সোণাপুৰৰ কমাৰকুছিত আৰু অধিক লোকে ভিৰ কৰাৰ সম্ভাৱনাই দেখা দিছে। প্ৰিয় শিল্পীক শেষ বিদায় দিবলৈ আহিয়েই আছে অনুৰাগী। এয়াই শিল্পীৰ মহত্ব, হেৰাই গৈয়ো যি হেৰাই নাযায়। আজীৱন ৰৈ যায় মানুহৰ বুকুৱে বুকুৱে।