মাণ্ডীত ১০জন লোকৰ মৃত্যু, ৩৪জন সন্ধানহীন

ডিজিটেল ডেস্ক : মুষলধাৰ বৰষুণে হিমাচল প্ৰদেশৰ জলপ্রলয়ৰ সৃষ্টি কৰে। প্ৰায় ১৩ ঘণ্টা ধৰি মুষলধাৰে হোৱা বৰষুণৰ ফলত ৰাজ্যখনৰ মাণ্ডীত ১০জন লোক নিহত আৰু ৩৪জনতকৈ অধিক লোক সন্ধানহীন হৈ আছে।

ধাৰাসাৰ বৰষুণৰ লগতে বানে জিলাখনৰ পৰিস্থিতি অধিক শোচনীয় কৰি তোলে। উদ্ধাৰ আৰু সাহায্য অভিযানত এন ডি আৰ এফ আৰু এছ ডি আৰ এফক কামত লগোৱা হৈছে। জিলাখনত ২৫৩.৫ মিলিমিটাৰ বৰষুণ হয়। ফলত ২৪৮টা পথ পানীয়ে বুৰাই পেলোৱাত বন্ধ হৈ পৰে।

উল্লেখযাগ্য যে মঙলবাৰে ৰাজ্যখনত কমেও ১১টা স্থানত ডাৱৰ বিস্ফোৰণ হয়। ইফালে ৰাজ্য চৰকাৰে দিয়া তথ্য মতে, ৰাজ্যখনত যোৱা ২০ জুনৰ পৰা হোৱা ধাৰাসাৰ বৰষুণ আৰু বানত মঙলবাৰলৈকে ৫২জন লোক নিহত হোৱাৰ লগতে আন ২২জন লোক সন্ধানহীন হৈ আছে। ৰাজ্যখনৰ ১২খন জিলা বান আৰু বৰষুণত প্ৰভাৱিত হৈছে।

উৎসঃ দৈনিক জনমভূমি