মৰিগাঁৱৰ এখন বিদ্যালয়ৰ শিক্ষকৰ প্ৰশংসনীয় পদক্ষেপ ; নিজৰ গাঠিৰ ধনেৰে ১০২গৰাকী ছাত্র-ছাত্ৰীক ছুৱেটাৰ প্ৰদান

ডিজিটেল ডেস্কঃ ৰাইজে নখ জোকাৰিলে নৈ বয় ৷ সকলোৱে সেৱাৰ মনোভাৱেৰে কাম কৰিলে পৃথিৱীত সকলো কামেই সম্ভৱ হয়। তেনে এক সেৱাৰ মহানুভৱতা প্ৰদৰ্শন কৰিলে মৰিগাঁও জিলাৰ এখন বিদ্যালয়ৰ শিক্ষক শিক্ষয়িত্ৰীয়ে । 

এই পদক্ষেপ মৰিগাঁও জিলাৰ আগশাৰী শিক্ষানুষ্ঠান মিকিৰভেটা উচ্চতৰ মাধ্যমিক বিদ্যালয়ৰ ৷ বিদ্যালয়খনত তিনি শতাধিক ছাত্ৰছাত্ৰীয়ে অধ্যয়ন কৰে যদিও ইয়াৰে অধিকাংশই আৰ্থিকভাৱে দুৰ্বল পৰিয়ালৰ ছাত্ৰ-ছাত্ৰী ৷ প্ৰচণ্ড শীত আৰু ইয়াৰ সৈতে যুঁজিবলৈ এটা গৰম পোছাকৰ বাৰুকৈ অভাৱ ৷শীতৰ প্ৰকোপত কঁপি কঁপি বিদ্যালয়ত পাঠদান কৰা লক্ষ্য কৰিয়ে বিদ্যালয় খনৰ শিক্ষক ভূপেন্দ্ৰ নাথ ডেকাৰ একক প্ৰচেষ্টাত বিদ্যালয়খনৰ অধ্যক্ষা বিভা দেৱী আৰু শিক্ষক শিক্ষয়িত্ৰীয়ে নিজাববীয়া খৰচত বিদ্যালয় খনৰ আৰ্থিকভাৱে দুৰ্বল পৰিয়ালৰ ১০২ গৰাকী ছাত্র ছাত্ৰীলৈ ছুৱেটাৰ প্ৰদান কৰে ৷ এই অনুষ্ঠানটিত মৰিগাঁও জিলা বিদ্যালয় সমূহৰ পৰিদৰ্শক ড° অপূৰ্ব ঠাকুৰীয়া , মিকিৰভেটা গাঁও পঞ্চায়তৰ সভাপতি সত্যজিৎ ডেকা ,বিদ্যালয় পৰিচালনা সমিতিৰ সভাপতি দিলীপ চন্দ্ৰ বৰকটকী আৰু বিদ্যালয়খনৰ শিক্ষক শিক্ষয়িত্ৰী উপস্থিত থাকে ।

এই অনুষ্ঠানটিত মৰিগাঁও জিলা বিদ্যালয় সমূহৰ পৰিদৰ্শক ড° অপূৰ্ব ঠাকুৰীয়াই কয় যে দুটা কামে মানুহক আত্মিক সুখ দিব পাৰে । সেয়া হৈছে ত্যাগ আৰু সেৱা। যদি সেৱা কাৰ্য অন্তৰৰ পৰা কৰা হয়, সেই সেৱাত থাকে মানুহৰ পৰম সুখ আৰু আনন্দ। বৰ্তমান শীতৰ লগত যুঁজ দিবলৈ আমাক এযোৰ গৰম পোছাকৰ অতি প্ৰয়োজন হয়। এই প্ৰয়োজনৰ সময়ত শিক্ষক ভূপেন্দ্ৰ নাথ ডেকাৰ একক প্ৰচেষ্টা আৰু বিদ্যালয়খনৰ শিক্ষক-শিক্ষয়িত্ৰীসকলৰ সহযোগত দুখীয়া পৰিয়ালৰ ছাত্ৰ-ছাত্ৰীসকলক এটিকৈ ছুৱেটাৰ প্ৰদানৰ যি চেষ্টা কৰিছে, সেয়া অতি প্ৰশংসনীয় ।