ডিজিটেল ডেস্কঃ ১২ কিলোগ্ৰাম ওজনৰ এটা যকৃতলৈ চিকিৎসকৰ কাষ চাপিছিল এগৰাকী মহিলাই৷ মহিলাগৰাকীৰ যকৃতটো এনেদৰে বৃদ্ধি পোৱাত আচৰিত হৈ পৰিছিল সকলোৱে৷ শিলিগুৰিৰ বাসিন্দা মহিলাগৰাকীক লগে লগে হায়দৰাবাদৰ এখন ব্যক্তিগত চিকিৎসালয়ত ভৰ্তি কৰোৱা হৈছিল৷ তাতেই তেওঁৰ অস্ত্ৰোপচাৰ কৰা হয়। মহিলাগৰাকী দীৰ্ঘদিন ধৰি যকৃতৰ সমস্যাত ভুগি আছিল। তেওঁৰ যকৃতৰ ওজন বাঢ়ি গৈ আছিল৷
অৱশেষত ১৪ ঘণ্টীয়া অস্ত্ৰোপচাৰৰ পিছত ৫০ বছৰীয়া মহিলাগৰাকীৰ দেহৰ পৰা চিকিৎসকে ১২ কিলোগ্ৰাম ওজনৰ যকৃত আঁতৰাবলৈ সক্ষম হয়। জটিল অস্ত্ৰোপচাৰটোত ১৪ ঘণ্টা সময় লাগিছিল বুলি জানিব পৰা গৈছে৷
যকৃতৰ ওজন বাঢ়ি যোৱাৰ বাবে এটা সময়ত এনে পৰিস্থিতিৰ সৃষ্টি হৈছিল যে মহিলাগৰাকীয়ে ভালদৰে খোজ কাঢ়িবও পৰা নাছিল৷ সামগ্ৰিকভাৱে তেওঁৰ শৰীৰৰ ওজনও যথেষ্ট বৃদ্ধি পাইছিল। চিকিৎসকসকলে কৈছে যে তেওঁৰ ২০১৯ চনৰ পৰাই ওজন বৃদ্ধি হোৱা আৰম্ভ কৰিছিল।
ৰোগীজন প্ৰথমে শিলিগুৰিৰ পৰা চিকিৎসাৰ বাবে কলকাতালৈ আহিছিল। চিকিৎসকে তেওঁক যকৃত সংৰোপণৰ পৰামৰ্শ দিছিল। তেওঁক হায়দৰাবাদৰ ব্যক্তিগত চিকিৎসালয়লৈ যাবলৈ কোৱা হৈছিল। পৰীক্ষাৰ পিছত চিকিৎসকসকলে জানিব পাৰিলে যে মহিলাগৰাকীৰ যকৃতৰ ওজন অস্বাভাৱিকভাৱে বৃদ্ধি পাইছে।
চিকিৎসকসকলে কৈছে যে মহিলাগৰাকীৰ পেটৰ বেছিভাগ ঠাই আগুৰী বিশাল যকৃতটো বিয়পি পৰিছিল। সাধাৰণতে, মানুহৰ যকৃতৰ ওজন ডেৰ কিলোগ্ৰাম হয় ।
যকৃত সংৰোপণ বিশেষজ্ঞ ডাঃ ৰবিচান্দ সিদ্ধচাৰীৰ নেতৃত্বত চিকিৎসকৰ এটা দলে হায়দৰাবাদৰ এখন চিকিৎসালয়ত ১৪ ঘণ্টা ধৰি মহিলাগৰাকীৰ শৰীৰত অস্ত্ৰোপচাৰ কৰে। মহিলাগৰাকীৰ বিশাল যকৃত আঁতৰ কৰাৰ উপৰি আৰু দুটা অঙ্গও সংৰোপণ কৰা হয়। অস্ত্ৰোপচাৰটো সফল হৈছে।চিকিৎসকসকলে কৈছিল যে মহিলাগৰাকীৰ যকৃতত চিষ্ট হৈছিল। তেওঁলোকৰ মতে এনে ধৰণৰ সমস্যা সাধাৰণতে ৩০ বছৰ বয়সৰ পিছত হোৱা দেখা যায়৷
Continue Reading
