ডিজিটেল ডেস্ক: যিজন ককায়েকৰ সৈতে একেটা ঘৰতে শৈশৱ পাৰ হৈছিল, সেইজন ককায়েকৰে বিৰুদ্ধে ভনীয়েকক হ*ত্যা কৰাৰ গুৰুত্বপূৰ্ণ অভিযোগ উত্থাপিত হৈছে। এই ঘটনা উত্তৰ প্ৰদেশৰ বাৰাবংকীৰ। ইয়াতে মনু নামৰ এগৰাকী যুৱতীক ককায়েক-বৌয়েকে হ*ত্যা কৰাৰ অভিযোগ উঠিছে।
আৰক্ষীৰ মতে, এই হত্যাৰ মূলতে আছিল ৪২ লাখ টকা। অভিযোগ উত্থাপিত হৈছে যে মনুৰ ককায়েক সন্দীপ আৰু তেওঁৰ পত্নী শীতলে বিচৰা নাছিল যে এই ধনৰ পৰা ভনীয়েকে কোনো অংশ লাভ কৰক। সেইবাবেই দুয়ো মিলি মনুক হ*ত্যা কৰে। আৰক্ষীয়ে দুয়োকে গ্ৰেপ্তাৰ কৰিছে।
ঘটনাটো বাৰাবংকীৰ ৰামনগৰ থানা এলেকাৰ। আৰক্ষীৰ মতে, সন্দীপৰ ঘৰটো মহাদেৱা কৰিড’ৰ প্ৰকল্পৰ আওতালৈ আহিছিল। ইয়াৰ বাবে ঘৰটো ভাঙি যোৱাৰ বিনিময়ত তেওঁ প্ৰায় ৪২ লাখ টকাৰ ক্ষতিপূৰণ হিচাপে লাভ কৰিবলৈ লৈছিল। আৰক্ষীয়ে জনোৱা মতে, এই টকাৰ বাবেই সন্দীপ আৰু তেওঁৰ পত্নী শীতলৰ মনত লোভ-লালসাৰ জন্ম হৈছিল। দুয়োয়ে বিচৰা নাছিল যে মনুক ক্ষতিপূৰণৰ অংশ দিব লাগিব। এই বিষয়টোক লৈয়েই দুয়ো মনুক তেওঁলোকৰ জীৱনৰ পৰা দূৰ কৰাৰ ষড়যন্ত্ৰ ৰচিছিল।
৩০ অক্টোবৰত মনুক হ*ত্যা কৰা হয়। অভিযোগ অনুসৰি, তেওঁৰ মূৰ আৰু মুখত ইটাৰে বাৰে বাৰে আঘাত কৰা হৈছিল। এই আক্ৰমণতে তেওঁৰ মৃত্যু হয়। মনু আছিল এগৰাকী অঙ্গনৱাড়ী কৰ্মী। তেওঁৰ হ*ত্যাৰ খবৰ বিয়পি পৰাৰ লগে লগে সমগ্ৰ অঞ্চলটোতে চাঞ্চল্যৰ সৃষ্টি হয়। এই গোচৰত মৃতকৰ ভাই সন্দীপ আৰু বৌয়েক শীতলৰ বিৰুদ্ধে নামধৰি গোচৰ পঞ্জীয়ন কৰা হয়। ইয়াৰ পিছতে আৰক্ষীয়ে তদন্ত আৰম্ভ কৰে।
মঙলবাৰে বাৰাবংকীৰ অতিৰিক্ত আৰক্ষী অধীক্ষক (উত্তৰ) বিবেক তিৱাৰীয়ে জনায় যে, স্বাট (SWAT), চাৰ্ভিলেন্স আৰু ৰামনগৰ আৰক্ষীৰ যুটীয়া দলে তদন্তৰ সময়ত পোৱা প্ৰমাণৰ ভিত্তিত সন্দীপ আৰু তেওঁৰ পত্নী শীতলক গ্ৰেপ্তাৰ কৰিছে। আৰক্ষীৰ মতে, জেৰা আৰু তদন্তত পোহৰলৈ আহিছে যে মনুৰ হ*ত্যাৰ আঁৰত আছিল মহাদেৱা কৰিড’ৰৰ বাবে পোৱা ক্ষতিপূৰণৰ ধন। উভয় অভিযুক্তকে গ্ৰেপ্তাৰ কৰি আদালতত হাজিৰ কৰোৱা হয় আৰু তাৰপৰা তেওঁলোকক জে’ললৈ প্ৰেৰণ কৰা হয়। গোচৰটোৰ পৰৱৰ্তী কাৰ্যব্যৱস্থা অব্যাহত আছে।
Continue Reading
