ডিজিটেল ডেস্কঃ এক পথ দুৰ্ঘটনাত এগৰাকী ১৭ বছৰীয়া ছাত্ৰীৰ মৃত্যু। ছাত্ৰীগৰাকীৰ পৰিয়ালে চিকিৎসালয়ত দান কৰিলে কিডনী আৰু লিভাৰ। ৩ গৰাকী ৰোগীয়ে লাভ কৰিলে নতুন জীৱন। হাস্পতাল কৰ্তৃপক্ষই তেওঁলোকৰ পৰিচয় প্ৰকাশ কৰা নাই কিয়নো পৰিয়ালে পৰিচয় গোপনে ৰাখিবলৈ ইচ্ছা প্ৰকাশ কৰিছে।
৬ ফেব্ৰুৱাৰীত ছোৱালীজনীয়ে দুৰ্ঘটনা পতিত হৈছিল। চিকিৎসকে সকলো প্ৰচেষ্টা কৰাৰ পাছতো ছোৱালীজনীৰ প্ৰাণৰক্ষা কৰিব পৰা নগ'ল। নাগপুৰৰ নিউ ইৰা হাস্পতালত তেওঁ মৃত্যুক আঁকোৱালি লয়।
অৱশ্যে পলম হোৱাৰ বাবে হৃদযন্ত্ৰ আৰু হাওঁফাওঁ দানৰ সম্ভাৱনা নোহোৱা হয় আৰু মৃত কিশোৰীগৰাকীৰ কিডনী আৰু লিভাৰ তিনিগৰাকী ৰোগীৰ দেহত সংৰোপণ কৰা হয়।
নিউ ইৰা হাস্পতালত ৩৮ বছৰীয়া এগৰাকী মহিলাৰ লিভাৰ সংৰোপণ কৰা হয়, একেখন চিকিৎসালয়তে ৩০ বছৰীয়া এজন যুৱকৰ এটা কিডনী সংৰোপণ কৰা হয়, আনহাতে আনটো কিডনী ২৭ বছৰীয়া এজন যুৱকৰ শৰীৰত সংৰোপণ কৰা হয়।
উল্লেখ্য যে মৃত ছোৱালীজনীৰ ভগ্নীয়ে পিতৃ-মাতৃক পতিয়ন নিয়ায় যে আমাৰ ছোৱালীজনীক আমি অংগদানেৰে জীয়াই ৰাখিম। প্ৰথম অৱস্থাত পৰিয়ালটোৱে একো সিদ্ধান্ত ল'ব পৰা নাছিল যদিও পাছত ভগ্নীৰ কথাবোৰ বিবেচনা কৰি চায় আৰু অংগদান কৰাৰ সিদ্ধান্ত লয়।
Continue Reading
