ডিজিটেল ডেস্কঃ সমাজবাদী পাৰ্টিৰ (এছপি) প্ৰবীণ নেতা আজম খান আৰু তেওঁৰ পুত্ৰ আব্দুল্লা আজম খানক উত্তৰ প্ৰদেশৰ এখন আদালতে ১৫ বছৰ পুৰণি গোচৰত দুবছৰৰ কাৰাদণ্ড বিহিছে। মোৰাদাবাদৰ আদালতৰ ন্যায়াধীশ স্মিতা গোস্বামীয়ে সমাজবাদী পাৰ্টীৰ পিতা-পুত্ৰক কাৰাবাসৰ নিৰ্দেশ দিয়ে৷
আদালতে লগতে তেওঁলোকক ৩,০০০ টকাৰ জৰিমনাও আৰোপ কৰে। উত্তৰ প্ৰদেশৰ চুয়াৰ সমষ্টিৰ বিধায়ক আজম খান, আব্দুল্লা আজম আৰু আন সাতজনৰ বিৰুদ্ধে ২০০৮ চনত মোৰাদাবাদৰ ছজলাইট আৰক্ষী থানাত এখন এজাহাৰ দাখিল কৰা হৈছিল। ২০০৮ চনৰ ২৯ জানুৱাৰীত ৰাজ্যিক ঘাইপথত প্ৰতিবাদ কৰাৰ পিছতে তেওঁলোকৰ বিৰুদ্ধে গোচৰ ৰুজু কৰা হৈছিল৷ ২০০৭ চনৰ ৩১ ডিচেম্বৰত উত্তৰ প্ৰদেশৰ ৰামপুৰতঅৰ্ধ সামৰিক বাহিনীৰ (চিআৰপিএফ) শিবিৰত হোৱা আক্ৰমণৰ পৰিপ্ৰেক্ষিতত তালাচী চলোৱাৰ বাবে আৰক্ষীয়ে আজম খান আৰু তেওঁৰ পুত্ৰৰ কনভয় ৰখাই দিছিল।
কিন্তু আজম খান আৰু তেওঁৰ পুত্ৰই আৰক্ষীক সহযোগিতা কৰাৰ সলনি আৰক্ষীৰ সৈতে তৰ্কত লিপ্ত হৈছিল৷ ইয়াৰ পিছতে ধাৰা ৩৫৩ (চৰকাৰী কৰ্মচাৰীক তেওঁৰ কৰ্তব্য পালনত বাধা দিয়া ) আৰু ভাৰতীয় দণ্ডবিধিৰ (আইপিচি) অন্যান্য ধাৰাৰ অধীনত তেওঁলোকৰ বিৰুদ্ধে গোচৰ ৰুজু হৈছিল৷ সেই গোচৰৰ ভিত্তিতে আজম খান আৰু তেওঁৰ পুত্ৰক দুবছৰৰ কাৰাবাস বহাৰ লগতে আন সাতজন অভিযুক্তক দোষমুক্ত ঘোষণা কৰা হয়। অৱশ্যে আদালতে খান আৰু আজম দুয়োকে জামিন প্ৰদান কৰিছে৷
ইপিনে এই ৰায়ৰ পিছতে আজম খানে কয় " মই ৰাজ্যখনত হয়তো ন্যায় নাপাম। মোক অত্যাচাৰ কৰা হৈছে... এয়া বিচাৰ নহয়... । ৰাজ্যখনৰ সকলো ঠাইতেই এতিয়া পৰিস্থিতি একেই ," ৷ ইপিনে আজম খানৰ পুত্ৰ আব্দুল্লা আজমৰ দুখন জন্মৰ প্ৰমাণপত্ৰৰ থকা বুলিও অভিযোগ উঠি আহিছে৷ অভিযোগ অনুসৰি তেওঁ ২০১৭ চনৰ নিৰ্বাচনত মনোনয়ন পত্ৰসৈতে ভুল জন্মৰ তাৰিখ দিছিল।
Continue Reading
