ডিজিটেল ডেস্কঃ এজন কৃতবিদ্য ভাৰতীয়৷দক্ষিণ আফ্ৰিকাৰ বৰ্ণবাদী ব্যৱস্থাৰ পৰা পোৱা ঐতিহাসিক শিক্ষা ভাৰতবাসীৰ মাজত প্ৰসাৰ কৰাৰ জৰিয়তে ২০০ বছৰীয়া ব্ৰিটিছ শাসনৰ উপসংহাৰ কৰা ব্যক্তিজনৰ আজি ওপজা দিন৷আজি গান্ধী জয়ন্তী-মহামানৱ মহাত্মা গান্ধীৰ জন্মদিন৷যিজন গান্ধীয়ে আঁঠুৰ মূৰলৈকে পৰিধান কৰা ধুতিখনৰ জৰিয়তে কঁপাই তুলিছিল ইংলেণ্ডৰ বৰঘৰ৷যাৰ কৰ্মস্পৃহা আৰু অদম্য সাহসে জন্ম দিছিল বহু সাহসী বীৰৰ৷কিন্তু সেইজন গান্ধীৰ কোনটো দিশৰ কথা আমি অধিক জানো?তেওঁৰ মৃত্যুৰ পাছতো ৰচি গৈছে বহু ইতিহাস৷যাৰ সাক্ষ্য বিশ্ব ইতিহাসৰ পাতে-পাতে সন্নিৱিষ্ট হৈ আছে৷
জাতিৰ পিতা হিচাপে মহাত্মা গান্ধীৰ জন্ম হৈছিল ১৮৬৯ চনৰ ২ অক্টোবৰত,স্থান আছিল- বৰ্তমান গুজৰাটৰ অংশ হিচাপে পৰিগণিত হোৱা পোৰবন্দৰত। এই বছৰ মহামানৱজনৰ ১৫৪ সংখ্যক জন্ম জয়ন্তী।
ভাৰতবৰ্ষত হোৱা স্বাধীনতা আন্দোলনক প্ৰথম শাৰীৰ পৰা নেতত্ব দিয়া ব্যক্তিসকলৰ ভিতৰত মহাত্মা গান্ধী আছিল অন্যতম৷জানো আহক মহাত্মা গান্ধীৰ বিষয়ে কিছু কমকৈ প্ৰচাৰিত বা প্ৰকাশ্য তথ্য-
১/টাইম মেগাজিনৰ সন্মান: ১৯৩০ চনত মহাত্মা গান্ধীক টাইম মেগাজিনৰ বৰ্ষশ্ৰেষ্ঠ ব্যক্তি উপাধিৰে সন্মানিত কৰা হয়, তেওঁ এই সন্মান লাভ কৰা প্ৰথম আৰু একমাত্ৰ ভাৰতীয় হিচাপে পৰিগণিত হয়।
২/ আইৰিছ উচ্চাৰণ: মহাত্মা গান্ধীয়ে আইৰিছ উচ্চাৰণেৰে ইংৰাজী কৈছিল কাৰণ তেওঁৰ প্ৰথম শিক্ষকসকলৰ ভিতৰত এজন আয়াৰলেণ্ডৰ আছিল।
৩/শান্তিৰ নোবেল বঁটাৰ বাবে মনোনয়ন: পাঁচবাৰকৈ শান্তিৰ নোবেল বঁটাৰ বাবে মনোনীত হোৱাৰ পাছতো গান্ধীয়ে কেতিয়াও এই বঁটা লাভ কৰা নাছিল।
৪/অন্ত্যেষ্টিক্ৰিয়া: গান্ধীৰ অন্ত্যেষ্টিক্ৰিয়াৰ বাবে যোৱা শোভাযাত্ৰাত ৮ কিলোমিটাৰজুৰি লোকে লোকাৰণ্য হৈ পৰিছিল৷
৫/গান্ধীৰ নামেৰে নামাকৰণ কৰা পথসমূহঃ ভাৰতৰ বাহিৰত ৪৮টা আৰু দেশৰ ভিতৰতে ৫৩টা পথ মহাত্মা গান্ধীৰ নামেৰে নামাকৰণ কৰা হৈছে।যিটো বিশ্বৰ কোনো ব্যক্তিৰ ক্ষেত্ৰতে বিৰল৷
৬/হেনৰী ফ’ৰ্ডৰ প্ৰশংসা: ফ’ৰ্ড মটৰ কোম্পানীৰ প্ৰতিষ্ঠাপক হেনৰী ফ’ৰ্ড আছিল মহাত্মা গান্ধীৰ এজন নিষ্ঠাবান প্ৰশংসক আৰু অনুগামী।
Continue Reading
