ডিজিটেল ডেস্কঃ পিতৃৰ পদাংক অণুসৰণ কৰি এগৰাকী সাহসী কন্যাই যোগ দিলে ভাৰতীয় সেনাবাহিনীত। জম্মু-কাশ্মীৰত তেওঁৰ পিতৃ মেজৰ নৱনীত ভাট শ্বহীদ হোৱাৰ ২০ বছৰৰ পাছত শনিবাৰে ভাৰতীয় সেনাবাহিনীত নিযুক্তি লাভ কৰে লেফটেনেণ্ট ইনায়ত ভাটে। চেন্নাইৰ অফিচাৰ্ছ ট্ৰেইনিং একাডেমীত প্ৰশিক্ষণ গ্ৰহণ কৰি মিলিটাৰী ইনটেলিজেন্স কৰ্পছত লেফটেনেণ্ট হিচাপে যোগ দিয়ে ইনায়তে।
পাছিং আউট পেৰেডত ইনায়তে পিন্ধিছিল সেই একেটা অলিভ গ্ৰীণ ইউনিফৰ্ম যি ইউনিফৰ্ম তেওঁৰ দেউতাক নৱনীত ভাটে পৰিধান কৰিছিল। মাত্ৰ তিনি বছৰ বয়সতে পিতৃ নৱনীত ভাটক হেৰুৱাইছিল ইনায়তে।
ভাৰতীয় সেনাই এক্সত ইনায়তৰ ছবি পোষ্ট কৰি লিখে “স্বাগতম, সেনাৰ কন্যা লেফটেনেণ্ট ইনায়ত ভাটছ”
মাতৃ শিবানী ভাটছকো ছবিখনত কাষতে থিয় হৈ থকা দেখা গৈছে।
২০ বছৰ পূৰ্বে জম্মু-কাশ্মীৰত তেওঁৰ পিতৃৰ কৰ্মৰত অৱস্থাতে মৃত্যু হৈছিল। ইনায়ত ভাটছক সামৰিক চোৰাংচোৱা বাহিনীত লেফটেনেণ্ট হিচাপে নিযুক্তি দিয়া হৈছে।
চণ্ডীগড়ৰ পৰা অহা মেজৰ নৱনীত ভাটক ৩ গোৰ্খা ৰাইফলছ ৰেজিমেণ্টৰ চতুৰ্থ বেটেলিয়নত নিযুক্তি দিয়া হৈছিল। ২০০৩ চনৰ নৱেম্বৰ মাহত শ্ৰীনগৰত বিদ্ৰোহ বিৰোধী অভিযানত কৰ্মৰত অৱস্থাতে মৃত্যু হৈছিল নৱনীত ভাটৰ।
নৱনীত ভাটৰ বীৰত্ব আৰু পৰম ত্যাগৰ বাবে তেওঁক বীৰত্ব বঁটা, সেনা পদক দিয়া হৈছিল।
ইনায়ত ভাট দিল্লী বিশ্ববিদ্যালয়ৰ লেডী শ্ৰী ৰাম কলেজৰ স্নাতক।
২০২৩ চনৰ এপ্ৰিল মাহত চেন্নাইৰ বিষয়া প্ৰশিক্ষণ একাডেমীত যোগদান কৰাৰ পূৰ্বে দিল্লী বিশ্ববিদ্যালয়ৰ হিন্দু মহাবিদ্যালয়ত ৰাজনীতি বিজ্ঞানত স্নাতকোত্তৰ ডিগ্ৰী লাভ কৰিছিল ইনায়তে।
Continue Reading
