ডিজিটেল ডেস্কঃ যোগীন্দৰ শৰ্মাক মনত আছেনে? দেশৰ তাৰকা ক্ৰিকেটাৰসকলৰ মাজত স্থান নাপালেও এই অলৰাউণ্ডাৰগৰাকীৰ বাবেই প্ৰথমটো টি২০ বিশ্বকাপ জয় কৰিছিল টীম ইণ্ডিয়াই! হয়, ২০০৭ চনৰ বিশ্বকাপৰ অন্যতম নায়ক এই যোগীন্দৰ শৰ্মা। পাকিস্তানৰ বিৰুদ্ধে বিশ্বকাপৰ ফাইনেলৰ শেষ অভাৰত কৰা তেওঁৰ বলিঙক এতিয়াও মনত পেলায় ক্ৰিকেটপ্ৰেমীসকলে। তেওঁৰ প্ৰদৰ্শনৰ বাবেই শেষ হাঁহি মাৰে মহেন্দ্ৰ সিং ধোনী বাহিনীয়ে।
এতিয়া ক্ৰিকেট নেখেলে শৰ্মাই। সকলো ধৰণৰ ক্ৰিকেটৰ পৰা অৱসৰ ল’লে যোগীন্দৰ শৰ্মাই। বিশ্বকাপত সফলতা লাভ কৰিয়েই যোগীন্দৰে হাৰিয়ানা পুলিচত চাকৰি পাইছিল। তাতে এতিয়াও তেওঁ কাম কৰি আছে। তেওঁ আৰক্ষীৰ ভূমিকাত সাধাৰণ মানুহক সহায় কৰি আহিছে। ক’ভিডৰ সময়তো ব্যাপক কাৰ্যপন্থা হাতত লৈছিল।
২০০৭ চনৰ সেই ফাইনেলত যোগীন্দৰ শৰ্মাই মিছবাহ উল হকৰ উইকেট দখল কৰিছিল। যিয়ে ভাৰতলৈ লৈ আহিছিল বিশ্বকাপ। যোগীন্দৰে এবাৰ কৈছিল, "মই ভাৰতৰ হৈ খেলিবলৈ সক্ষম হ’লো। ২০০২ চনৰ পৰা ২০১৭ চনলৈ ক্ৰিকেট খেলিছিলো। এইখিনিয়েই মোৰ জীৱনৰ আটাইতকৈ ভাল সময় আছিল। সকলো সতীৰ্থ, প্ৰশিক্ষক আৰু গুৰুলৈ ধন্যবাদ। আপোনালোকৰ লগত খেলিবলৈ পাই ধন্য মানিলো। মোৰ সপোন বাস্তৱায়িত হ’ল।’’
উল্লেখ্য যে যোগীন্দৰে ভাৰতৰ হৈ মাত্ৰ ৮ খন মেচ খেলিছিল। ৪ খন এদিনীয়া আৰু ৪ খন টি-২০। তেওঁ ২০০৪ চনৰ পৰা ২০০৭ চনলৈ ভাৰতীয় দলত এই ৮ খন খেল খেলাৰ সুযোগ পাইছিল। আই পি এলতো তেওঁ ধোনীৰ দলত আছিল। যোগীন্দৰে চেন্নাই ছুপাৰ কিংছৰ হৈ খেলিছিল। আইপিএলৰ ১৬খন মেচত তেওঁ ১২টা উইকেট দখল কৰিছিল।
Continue Reading
