ডিজিটেল ডেস্কঃ ভাৰতীয় জিমনাষ্ট দীপা কৰ্মকাৰক ডোপ পৰীক্ষাত বিফল হোৱাৰ বাবে কঠোৰ শাস্তি বিহা হৈছে। ভাৰতীয় জিমনাষ্টগৰাকীক ২১ মাহৰ বাবে নিষিদ্ধ কৰা হৈছে। তেওঁক ইন্টাৰনেছনেল টেস্টিং এজেন্সিয়ে এই শাস্তি বিহাৰ কথা ঘোষণা কৰিছে৷ দীপাই ২০২১ চনৰ অক্টোবৰৰ পৰা কোনো খেলত অংশগ্ৰহণ কৰিবলৈ সক্ষম হোৱা নাই।
খেলুৱৈগৰাকীৰ বিৰুদ্ধে ঘোষণা কৰা শাস্তি জুলাই ২০২৩ লৈকে বলবৎ থাকিব। কাৰণ তেওঁ ইতিমধ্যেই কোনো খেলত ভাগ লোৱাৰ পৰা আঁতৰি আছে৷ দীপাই এই সময়ছোৱাত ভাৰতৰ হৈ কোনো আন্তঃৰাষ্ট্ৰীয় প্ৰতিযোগিতাত অংশগ্ৰহণ কৰিব নোৱাৰিব।
আই.টি.এ.-ৰ মতে, দীপাৰ শৰীৰত হাইজিনমাইন নামৰ এটা নিষিদ্ধ পদাৰ্থ পোৱা গৈছে। ২০২১ চনত ফেডাৰেচন ইণ্টাৰনেচনেল ডি জিমনাষ্টিকছ (এফআইজি)ৰ দ্বাৰা কৰা পৰীক্ষাতো একে পদাৰ্থই পোৱা গৈছিল। দীপাক ২০২১ চনৰ ১১ অক্টোবৰৰ পৰা খেলৰ পৰা নিৰ্বাসিত কৰা হৈছিল। আইটিএয়ে পিছত দীপাৰ নমুনা পৰীক্ষা কৰিছিল।উল্লেখ্য হাইজিনমাইন নামৰ এই পদাৰ্থবিধে হাঁওফাঁওত অক্সিজেনৰ মাত্ৰা বৃদ্ধি কৰাত সহায় কৰে।
যিহেতু দীপাই ইতিমধ্যে ১৬ মাহৰ নিৰ্বাসন সম্পূৰ্ণ কৰিছে, তেওঁ আৰু পাঁচ মাহ শাস্তি ভোগ কৰিব লাগিব৷ সেয়ে দীপাৰ ২০২৪ চনৰ পেৰিছ অলিম্পিকত অংশগ্ৰহণ কৰাত কোনো সমস্যা নহ'ব ৷
Continue Reading
