ডিজিটেল ডেস্কঃ বোকাময় পথাৰত এইবাৰ ভূঁই ৰোৱাত ব্যস্ত হ’ল কংগ্ৰেছৰ নেতা ৰাহুল গান্ধী। হাৰিয়ানাৰ খেতিয়কৰ সৈতে একেলগে ভূঁই ৰুলে ৰাহুলে। বগা টি-চাৰ্ট, আঁঠুলৈকে ট্ৰাউজাৰ পিন্ধি ৰাহুল গান্ধীয়ে কৃষকৰ সমানেই ভূঁই ৰুলে।
কংগ্ৰেছ নেতাগৰাকীক হাৰিয়ানাৰ চনিপটত এনে ৰূপত দেখা পাই বহুতেই আচৰিত হ’ল। শনিবাৰে পুৱা তেওঁ কৃষকসকলৰ সৈতেবোকাময় পথাীৰত ভূঁই ৰুবলৈ নামিছিল।কংগ্ৰেছৰ প্ৰাক্তন সভাপতিগৰাকীয়ে হিমাচল প্ৰদেশলৈ গৈ থকাৰ সময়তে এনেদৰে হাৰিয়ানাত কৃষকসকলক সংগ দিয়ে। যাত্ৰাৰ মাজতে তেওঁ হাৰিয়ানাৰ মদিনা গাঁৱৰ পথাৰত ভূঁই ৰোৱে। তেওঁ এখন ট্ৰেক্টৰো চলায়।
কৃষকসকলৰ সৈতে কথা পাতি ৰাহুল গান্ধীয়ে তেওঁলোকৰ সুখ-দুখৰ বিয়য়ে জানিবলৈ চেষ্টা কৰে। স্বাভাৱিকতে কৃষকসকলে ৰাহুল গান্ধীৰ দৰে নেতাক তেওঁলোকৰ সৈতে পথাৰত পাই আনন্দিত হৈ পৰে।
সঞ্জয় কুমাৰ নামৰ এজন কৃষকে সংবাদ মাধ্যমৰ আগত কয়, "যিসকলে পথাৰত কাম কৰি আছিল তেওঁলোকৰ বহুতেই প্ৰথমে ৰাহুল গান্ধীক চিনিয়েই পোৱা নাছিল । আমি সকলোৱে তেওঁক দেখি আচৰিত হৈছিলো। আমি তেওঁক পুৱাৰ আহাৰ পৰিৱেশন কৰিছিলো। তেওঁ আমাৰ সমস্যাবোৰ শুনিছিল। তেওঁ এখন ট্ৰেক্টৰো চলাইছিল। "
মন কৰিব যে ৰাহুল গান্ধীয়ে এনে কৰা এয়াই প্ৰথম ঘটনা নহয়। ইয়াৰ পূৰ্বেও ৰাহুলক মাছমৰীয়াসকলৰ সৈতে এখন নাওত উঠি জাল মৰা দেখা গৈছিল।
Continue Reading
