ডিজিটেল ডেস্কঃ ২০২৮ চনত লছ এঞ্জেলছত অনুষ্ঠিত হ’বলগীয়া গ্ৰীষ্মকালীন অলিম্পিকত ক্ৰিকেট অন্তৰ্ভুক্ত হ’বনে? এই প্ৰশ্নৰ উত্তৰ অহা ১৫ অক্টোবৰৰ পৰা ১৭ অক্টোবৰলৈ মুম্বাইত অনুষ্ঠিত হ’বলগীয়া আন্তঃৰাষ্ট্ৰীয় অলিম্পিক কমিটীৰ ১৪১ সংখ্যক অধিৱেশনত লোৱা হ’ব। এই সভাৰ মুকলি সভা অহা ১৪ অক্টোবৰত জিঅ’ ৱৰ্ল্ড চেণ্টাৰ (জে ডব্লিউ চি)ত অনুষ্ঠিত হ’ব। আই অ’ চিৰ চৰকাৰী ৱেবছাইটত প্ৰকাশিত বিবৃতি অনুসৰি এই অধিবেশনৰ পূৰ্বে ১২ অক্টোবৰৰ পৰা ১৪ অক্টোবৰলৈ আই অ’ চিৰ কাৰ্যবাহী ব’ৰ্ডৰ বৈঠক অনুষ্ঠিত হ’ব।
আই অ’ চিৰ বৈঠক সন্দৰ্ভত দিয়া বিবৃতিত এটা সূত্ৰই কয় যে যদি ২০২৮ চনৰ গ্ৰীষ্মকালীন অলিম্পিকত ক্ৰিকেট অন্তৰ্ভুক্ত কৰা হয় তেন্তে মুম্বাই অধিৱেশনতে ভৱিষ্যৎ প্ৰজন্মৰ বাবে ঘোষণা কৰা হ’ব। ইয়াৰ পূৰ্বে সিদ্ধান্ত লোৱা হ’ব যদিও আনুষ্ঠানিক যি কোনো কথা এই অধিৱেশনতহে ঘোষণা কৰা হ’ব।
অলিম্পিকত ক্ৰিকেট অন্তৰ্ভুক্ত কৰাৰ বাবে আইচিচিয়ে ৬টা দলৰ ইভেণ্টৰ প্ৰস্তাৱ আগবঢ়াইছে। ইয়াত মহিলা আৰু পুৰুষ উভয় দল অন্তৰ্ভুক্ত কৰা হ’ব। টি-২০ ফৰ্মেটৰ এই ইভেণ্টৰ মেচসমূহ সম্পূৰ্ণ হ’বলৈ প্ৰায় ৩ ঘণ্টা সময় লাগিব।
১৯০০ চনত পেৰিছ গেমছত ক্ৰিকেট অন্তৰ্ভুক্ত কৰা হয়। ইয়াৰ পিছত ১২৩ বছৰ পাৰ হৈ গ’ল যদিও ক্ৰিকেট অলিম্পিকত অন্তৰ্ভুক্ত হোৱা নাই। ক্ৰিকেটৰ জনপ্ৰিয়তাৰ প্ৰতি লক্ষ্য ৰাখি আই অ’ চিয়ে হয়তো ইয়াক অন্তৰ্ভুক্ত কৰাৰ সিদ্ধান্ত ল’ব পাৰে। ক্ৰিকেট অন্তৰ্ভুক্ত হ’লে সংবাদ মাধ্যমৰ অধিকাৰৰ জৰিয়তেও ইয়াৰ উপাৰ্জন তিনিগুণ বৃদ্ধি পাব। বিচিচিআইয়েও আইচিচিয়ে ক্ৰিকেটক অলিম্পিকত অন্তৰ্ভুক্ত কৰাৰ পদক্ষেপক সমৰ্থন জনাইছে।
