ডিজিটেল ডেস্কঃ পৰ্যাপ্ত কৰ্মী অবিহনেই চলিছে দেশৰ সৰ্ববৃহৎ চোৰাংচোৱা সংস্থা CBI৷ কৰ্মী আৰু প্ৰশিক্ষণ বিভাগে ২০২২-২৩ চনৰ বাৰ্ষিক প্ৰতিবেদনত উল্লেখ কৰিছে যে চিবিআইত বিশেষ সঞ্চালক, যুটীয়া সঞ্চালক আৰু ডিআইজিৰ পদকে ধৰি ২৩ শতাংশ কৰ্মচাৰীৰ নাটনিৰ সন্মুখীন হৈছে, কাৰণ ১০২৫টা গোচৰ (৯৪৩টা পঞ্জীয়নভুক্ত গোচৰ আৰু ৮২টা প্ৰাথমিক তদন্ত) এতিয়াও অমীমাংসিত হৈয়ে আছে।
প্ৰতিবেদনত কোৱা হৈছে যে, ‘২০২২ চনৰ ৩১ ডিচেম্বৰলৈকে চিবিআইৰ মুঠ অনুমোদিত কৰ্মচাৰী আছিল ৭,২৯৫ জন, যাৰ বিপৰীতে ৫,৬০০ বিষয়া পদত আছিল আৰু ১,৬৯৫টা পদ খালী আছিল।’ইণ্ডিয়ান এক্সপ্ৰেছৰ তথ্য অনুসৰি ডিঅ’পিটিৰ প্ৰতিবেদনত কোৱা হৈছে যে ২০২০ চনৰ ৩১ ডিচেম্বৰলৈকে চিবিআইত কৰ্মচাৰীৰ মুঠ অনুমোদিত শক্তি আছিল ৭,২৭৩ আৰু ইয়াৰে ১,৩৭৪টা পদ খালী হৈ আছে। আনহাতে ২০২১ চনত ১,৫৩৩টা পদ খালী হৈ আছিল।
প্ৰতিবেদন অনুসৰি চিবিআইৰ ১ জন বিশেষ/অতিৰিক্ত সঞ্চালক, ২ জন যৌথ সঞ্চালক, ১১ জন ডিআইজি, ৯ জন এছএছপি, ১ জন অতিৰিক্ত এছপি, ৬৫ জন উপ এছপি, ৩৬০ জন পৰিদৰ্শক, ২০৪ জন উপ পৰিদৰ্শক, ৫১ জন সহকাৰী উপ পৰিদৰ্শক, ১২৩ জন হেড কনিষ্টবল, ২৮১ জন কনিষ্টবল আৰু ৩৬৭জন বিষয়াৰ পদ খালী হৈ আছে।
উল্লেখ্য যে চিবিআইৰ শক্তি প্ৰত্যক্ষভাৱে নিযুক্তিপ্ৰাপ্ত কৰ্মী আৰু ডেপুটেচনত ৰাজ্যিক আৰক্ষীৰ জোৱানৰ দ্বাৰা গঠিত, আনহাতে সকলো উচ্চ পদ সম্পূৰ্ণৰূপে ডেপুটেচন বিষয়াই দখল কৰে৷প্ৰতিবেদনত কোৱা হৈছে, ‘২০২২ চনত চিবিআইত ডেপুটেচনত অন্তৰ্ভুক্ত কৰা হৈছিল বিভিন্ন পদবীৰ মুঠ ৩০৮জন বিষয়া। লগতে যুটীয়া সঞ্চালকৰ পৰা কনিষ্টবললৈকে বিভিন্ন পদবীৰ ১৩৩জন বিষয়াৰ ডেপুটেচনৰ কাৰ্যকাল বৃদ্ধি কৰা হৈছে৷’
প্ৰতিবেদনত লগতে কোৱা হৈছে, ‘৯৪৩টা পঞ্জীয়নভুক্ত গোচৰৰ ভিতৰত ৪৪৭টা গোচৰৰ তদন্ত এবছৰতকৈ অধিক সময় ধৰি চলি আছে। একেদৰে ৮২টা বাকী থকা তদন্তৰ ভিতৰত ৬০টা তদন্ত তিনিমাহতকৈ অধিক সময় ধৰি চলি আছে৷’
Continue Reading
