ডিজিটেল ডেস্কঃ আজি ‘গল্ডেন বয়’ নীৰজ চোপ্ৰাৰ জন্মদিন। দুখন ডাইমণ্ড লীগ, অলিম্পিকত স্বৰ্ণ পদক আৰু বিশ্ব চেম্পিয়নশ্বিপত ৰূপৰ পদককে ধৰি ২৫খন আন্তঃৰাষ্ট্ৰীয় খেলত ইতিহাস সৃষ্টি কৰা নীৰজ চোপ্ৰাই আজি অৰ্থাৎ ২৪ ডিচেম্বৰত ২৫ বছৰত ভৰি দিলে। দেশবাসীয়ে নীৰজক জনাইছে জন্মদিনৰ আন্তৰিক শুভকামনা।
২০১৩ চনত নীৰজে প্ৰথমবাৰৰ বাবে বিশ্ব জুনিয়ৰ এথলেটিকছৰ সৈতে আন্তঃৰাষ্ট্ৰীয় পৰ্যায়ত অভিষেক ঘটায়। ইয়াৰ পিছত ২০১৫ চনত নীৰজে ৮২ মিটাৰ জেভেলিন নিক্ষেপ কৰি দক্ষিণ এছিয়ান গেমছত প্ৰথমটো আন্তঃৰাষ্ট্ৰীয় পদক লাভ কৰে। টকিঅ’ অলিম্পিকত স্বৰ্ণ পদক জয় কৰাৰ পাছৰে পৰা বহু যুৱতীৰ নয়নৰ মণি হৈ পৰিছে নীৰজ চোপ্ৰা। বহু যুৱতীয়ে নিজৰ সপোন কোঁৱৰ বুলি অভিহিত কৰে নীৰজক।
অলিম্পিকৰ সফলতাৰ লগে লগে নীৰজৰ ছ’চিয়েল মিডিয়াতো ফ’ল’ৱাৰ দ্রুতগতিত বৃদ্ধি পালে৷ এই পদক লাভ কৰাৰ পিছৰে পৰা এতিয়ালৈকে তেওঁৰ ফেন ফ’ল’ৱাৰ ৬০ লাখৰো অধিক বৃদ্ধি পাইছে। ইনষ্টাগ্ৰামতো তেওঁ সৰ্বাধিক চৰ্চিত এথলীট।
স্বৰ্ণ পদক বিজয়ী হোৱাৰ লগে লগে বিশেষকৈ মহিলা অনুৰাগীৰ মাজত নীৰজ চোপ্ৰাক লৈ যথেষ্ট উন্মাদনাৰ সৃষ্টি হৈছে। স্বৰ্ণ পদক লাভ কৰাৰ পাছতে হট ট্ৰেণ্ডত পৰিণত হ’ল নীৰজ। তেওঁক নেচনেল ক্ৰাছ বুলি কোৱা হয়। মহিলা অনুৰাগীসকল নীৰজৰ সকলো কথা জানিবলৈ আগ্ৰহী। তেওঁৰ কেৰিয়াৰ, খোৱা-বোৱা, পৰিয়াল আৰু বিশেষকৈ প্ৰেমৰ জীৱন। গুগলত তেওঁৰ প্ৰেমিকাৰ নামো সৰ্বাধিক ছাৰ্চ কৰে অনুৰাগীয়ে। কিন্তু নীৰজ চোপ্ৰাৰ প্ৰেমৰ বিষয়ে একো নাজানি হতাশ হয় অনুৰাগীসকল।
এটা সাক্ষাৎকাৰৰ সময়ত যেতিয়া নীৰজ চোপ্ৰাক তেওঁৰ প্ৰেমিকাক লৈ অহৰহ প্ৰশ্ন কৰা হৈছিল, তেতিয়া নীৰজক বিচলিত আৰু অস্বস্তিকৰ বোধ কৰা যেন লাগিছিল।
নীৰজক যেতিয়া সোধা হৈছিল যে ‘‘দেশৰ ছোৱালীবোৰ আপোনাৰ প্ৰেমত পৰিছে, সেই কথা জানি আপোনাৰ কেনে লাগিছে?’’ ইয়াৰ উত্তৰত লাজুকীয়া হাঁহি এটা মাৰি স্বৰ্ণ পদক বিজয়ীগৰাকীয়ে মাথোঁ কৈছিল, ‘‘মানুহে মানুহক ভাল পোৱাটো ভাল কথা, কিন্তু এই মুহূৰ্তত মোৰ মনোযোগ সম্পূৰ্ণৰূপে খেলৰ ওপৰত। মোৰ প্ৰেম এতিয়া মাথোঁ খেলৰ লগত।’’
‘বিবাহক লৈ ঘৰৰ পৰা হেঁচা আছে নেকি’ বুলিও সোধা হৈছিল নীৰজ চোপ্ৰাক? এই প্ৰশ্নৰ উত্তৰত নীৰজে কয়, ‘‘নাই, এই মুহূৰ্তত মোৰ সমগ্ৰ মনোযোগ খেলৰ ওপৰত। এইবোৰ হৈ থাকিব কিন্তু এতিয়া মই মাত্ৰ মোৰ খেলত মনোনিৱেশ কৰিব বিচাৰো।’’
Continue Reading
