ডিজিটেল ডেস্কঃ দেওবাৰে ছাৱাই মানছিং ষ্টেডিয়ামত লক্ষ্ণৌ ছুপাৰ জায়েন্টছৰ বিৰুদ্ধে শক্তিশালী বেটিং প্ৰদৰ্শন কৰে ৰাজস্থান ৰয়েলছে। ২০ অভাৰত ৪ উইকেট হেৰুৱাই মুঠ ১৯৩ ৰান সংগ্ৰহ কৰে। অধিনায়ক সঞ্জু চেমছনে অপৰাজিত ৮২ ৰান কৰে। আনহাতে, ৰিয়ান পৰাগে মাত্ৰ ২৯টা ডেলিভাৰীত ৪৩ ৰান সংগ্ৰহ কৰি ইনিংছ সুস্থিৰ কৰি তুলিছিল। ষষ্ঠ অভাৰত ৪৯/২ ৰানত বেটিং কৰিবলৈ আহি পৰাগে অধিনায়কৰ স’তে ৯৩ ৰানৰ ষ্টেণ্ড স্থাপন কৰে।
ইনিংছটো সন্দৰ্ভত প্ৰতিক্ৰিয়া ব্যক্ত কৰিছে ২২ বছৰীয়া ৰিয়ানে। কয়, ''মোৰ মূল লক্ষ্য আছিল খেলখন গভীৰলৈ লৈ যোৱা। উইকেটটো অতি ফ্লেট হৈ আছিল আৰু স্পিনাৰসকলৰ সহায়ক হৈ আছিল।’’
শেহতীয়াকৈ ঘৰুৱা চিজনত দূৰ্দান্ত প্ৰদৰ্শন কৰিছে ৰিয়ানে। পৰাগে স্পষ্ট কৰি দিয়ে, ''মোৰ মানসিকতা আছিল সহজ, মই মোৰ ঘৰুৱা খেল খেলাৰ ধৰণেই মই মাত্ৰ যোৱা ১০ দিনত ভাল অনুশীলন কৰিলোঁ আৰু আজি কাৰ্যকৰী কৰিলোঁ।’’
ৰাজস্থানে মেচখনত প্ৰথমে বেটিং কৰিবলৈ বাছি লৈছিল আৰু জোছ বাটলাৰ আৰু যশস্বী জয়ছৱালে দ্ৰুত আৰম্ভণি দিছিল যদিও দুয়োজন অ’পেনাৰেই ক্ৰমে ১১ আৰু ২৪ ৰানত আউট হৈছিল। চেমছনৰ সৈতে অপৰাজিত হৈ থকা ধ্ৰুৱ জুৰেলে ২০ ৰানৰ অৱদান দি ৰাজস্থানক শক্তিশালী স্ক’ৰলৈ আগুৱাই লৈ যায়।
Continue Reading
