ডিজিটেল ডেস্কঃ ভাগ্যৰ চকৰি কেতিয়া কোন দিশত ঘূৰে সেয়া কোনেও ক’ব নোৱাৰে৷ সৌভাগ্যই লগ দিয়াৰ বাবেই ১৯ বছৰ বয়সতে কোটিপতি হ’ল পশ্চিম বংগৰ উত্তৰ দিনাজপুৰৰ ৰায়গঞ্জৰ এজন ৰাজমিস্ত্ৰী। শেহতীয়াকৈ তেওঁ লটাৰীত এক কোটি টকা লাভ কৰিছে। বিষয়টো জনাৰ লগে লগে যুৱকজনৰ ঘৰত আনন্দৰ লহৰ বৈ গৈছে৷ চুবুৰীয়াসকলৰ মাজতো আনন্দৰ ঢৌ উঠিছে৷
যুৱকজনৰ নাম মিথু দেবশৰ্মা। পেছাত এজন ৰাজমিস্ত্ৰী। তেওঁৰ বয়স মাত্ৰ ১৯ বছৰ। যুৱকজন ৰায়গঞ্জৰ বীৰঘাই গ্ৰাম পঞ্চায়তৰ বাসিন্দা। আৰ্থিক অনাটনৰ মাজৰে চলিছিল মিথুৰ পৰিয়ালটো৷ মিথুৱে প্ৰায়ে ধনী হোৱাৰ সপোন দেখিছিল। মিথুৱে তেওঁৰ ভাগ্য সলনি কৰাৰ আশাত লটাৰীৰ টিকট এখন কিনিছিল। কিন্তু তেওঁ সপোনতো ভবা নাছিল যে সেই খন লটাৰীৰ টিকটেই তেওঁৰ ভাগ্য সলাই পেলাব৷ কিন্তু নভবা কথাটোৱেই হ’ল৷
মিথুৱে যোৱা শনিবাৰে ৩০ টকাৰে লটাৰীৰ টিকটটো কিনিছিল। তাৰ পিছতে ভাগ্য সলনি হৈ গ’ল মিথুৰ। মিথুৱে জানিব পাৰিলে যে তেওঁ ১ কোটি টকাৰ প্ৰথম পুৰস্কাৰ লাভ কৰিছে। প্ৰথমে তেওঁ কথাষাৰ বিশ্বাস কৰিব পৰা নাছিল৷ পিছত খবৰ লৈ তেওঁ সেই বিষয়ত নিশ্চিত হয়৷
আনন্দত আত্মহাৰ হৈ পৰা মিথুৱে কয় "মই এজন মিস্ত্ৰী। মই কেতিয়াও ১ কোটি টকাৰ সপোন দেখা নাছিলো। মই দিন হাজিৰা কৰি খাওঁ। মই মোৰ আনন্দ বুজাব পৰা নাই।" কিন্তু আনন্দৰ লগতে মিথুৰ মনতো অলপ ভয়ো আছে। ইমান টকাৰে তেওঁ কি কৰিব? তেওঁ কয় যে পৰিয়ালটোৰ অৱস্থা একেবাৰে ভাল নহয়। পৰিয়ালৰ বাবে সকলো ধন খৰচ কৰিব।
উল্লেখ্য কিছুদিন পূৰ্বে বংগৰে মন্টেশ্বৰৰ বাঘাচান পঞ্চায়তৰ বাঘাচান গাঁৱৰ বাসিন্দা উৎপল পালেও লটাৰীত কোটি টকা লাভ কৰিছিল। পেছাত বাছ কৰ্মী মানুহজনে কষ্টৰে অৰ্জা ধনেৰে লটাৰী টিকট কাটিছিল। তাতেই তেওঁৰ ভাগ্য সলনি হৈ পৰিছিল৷
Continue Reading
