ডিজিটেল ডেস্কঃতামিলনাডুৰ মাদুৰাইত ষাঁড় যুঁজৰ সময়তে ষাঁড়ৰ আক্ৰমণত ৬০ জনৰো অধিক লোক আহত হৈছে। মাদুৰাইৰ অৱনিয়াপুৰমত এক জাল্লিকাট্টু অনুষ্ঠানত প্ৰায় ৬০ জন লোক আঘাতপ্ৰাপ্ত হয় বুলি আৰক্ষীয়ে প্ৰকাশ কৰিছে।
আঘাতপ্ৰাপ্তসকলৰ ভিতৰৰে ২০ জনে অতি গুৰুতৰভাৱে আঘাতপ্ৰাপ্ত হয় বুলি জানিব পৰা গৈছে। এজন শীৰ্ষ বিষয়াই কয় " আমাৰ প্ৰায় ৬০ জন আহত হৈছে, ২০ জনৰ অৱস্থা অলপ গুৰুতৰ আৰু তেওঁলোকক ৰাজাজী চিকিৎসালয়লৈ প্ৰেৰণ কৰা হৈছে। সামান্য আঘাতপ্ৰাপ্ত আন ৪০ জনক প্ৰাথমিক চিকিৎসা প্ৰদান কৰা হৈছে। কোনো লোকৰ মৃত্যু হোৱা নাই ।
মাদুৰাইৰ জিলা উপায়ুক্ত অনীশ শেখৰে কয় যে খেলত অংশগ্ৰহণকাৰীসকলৰ লগতে দৰ্শকৰ সুৰক্ষা নিশ্চিত কৰাৰ বাবে সকলো ব্যৱস্থা কৰা হৈছে। মাদুৰাইৰ চৰকাৰী ৰাজাজী চিকিৎসালয়লৈ প্ৰেৰণ কৰা ২০ জন আহতৰ ভিতৰত ১১ জন এতিয়াও তাত চিকিৎসাধীন হৈ আছে। ঘটনাটো স্বত্বেও, চলিত জাল্লিকাট্টু অনুষ্ঠানটো আবেলি ৪ বজালৈকে অব্যাহত আছিল, বিষয়াজনে লগতে কয়।
Continue Reading
