ডিজিটেল ডেস্কঃ মটৰবাইকত ৰঙা বেগ কঢ়িয়াই নিয়া আৰু ঘৰে ঘৰে ৰেষ্টুৰেণ্টৰ খাদ্য ডেলিভাৰী কৰা ১০০ জনৰ ভিতৰত কমেও ৩২ জন কলেজৰ স্নাতক। কিন্তু মানুহৰ ঘৰলৈ খাদ্য ডেলিভাৰী হ’লেও মাহৰ শেষত নিজৰ পেট পুহিবলৈ হাবাথুৰি খাইছে তেওঁলোকে৷ কাৰণ মূল্যবৃদ্ধি আৰু পেট্ৰ’ল-ডিজেলৰ মূল্য। গতিকে দিনটোত ১১ ঘণ্টা কাম কৰি উপাৰ্জন কৰিলেও সকলো খৰচ হয়।
দিল্লীস্থিত বিত্তীয় গৱেষণা সংস্থা ‘নেশ্যনেল কাউন্সিল অৱ এপ্লাইড ইকনমিক ৰিচাৰ্চ’ই দেশৰ ২৮খন চহৰৰ খাদ্য ডেলিভাৰী কৰ্মীসকলৰ ওপৰত এক সমীক্ষা প্ৰতিবেদন প্ৰকাশ কৰে। সমীক্ষাৰ প্ৰতিবেদন অনুসৰি খাদ্য ডেলিভাৰী কৰ্মী হিচাপে কাম কৰা ৬৭ শতাংশ লোকে অধিক আয় বা অতিৰিক্ত আয়ৰ আশাত এই চাকৰিত যোগদান কৰে। সপ্তাহত ছয় দিন দিনটোত কমেও ১১ ঘণ্টা কাম কৰাৰ পিছত তেওঁলোকৰ মাহিলী গড় আয় মাত্ৰ ২০,৭৪৪ টকা।
কেন্দ্ৰীয় চৰকাৰৰ ২০২১-২২ বৰ্ষৰ শ্ৰমিক শক্তি সমীক্ষা (Periodic Labor Force Survey)ত এই শ্ৰেণীৰ শ্ৰমিকৰ গড় মাহিলী আয় ২২,০০০ টকাৰো অধিক বুলি উল্লেখ কৰা হৈছে। খাদ্য ডেলিভাৰী কৰ্মীসকলে ইয়াতকৈ প্ৰায় ১০ শতাংশ কম উপাৰ্জন কৰে। বিশেষজ্ঞসকলৰ মতে এই চাকৰিটো শৈক্ষিক অৰ্হতা অনুসৰি কোনো চাকৰি নোপোৱাকৈয়ে শেষ উপায় হিচাপে বাছি ল’ব লগা হয়।
সমীক্ষাত অংশগ্ৰহণ কৰা ৩১ শতাংশতকৈ অধিক খাদ্য ডেলিভাৰী কৰ্মীয়ে কয় যে তেওঁলোকে প্ৰায় চাৰি মাহ বহি থকাৰ পিছত এই কামটো বাছি লৈছিল। ৯ শতাংশ শ্ৰমিকে চাকৰি হেৰুৱাই এই কাম কৰি আছে। প্ৰায় ২৪ শতাংশ শ্ৰমিকে প্ৰথম কাম হিচাপে এই কাম কৰি আছে। ইয়াৰে ৮৮ শতাংশই এতিয়াও পঢ়া-শুনা কৰি আছে। বহুতে দিনটোত পাঁচ ঘণ্টা কাম কৰি আন কামৰ উপৰিও অতিৰিক্ত উপাৰ্জন কৰিবলৈ ধৰিছে। সপ্তাহত ৩০ ঘন্টা কাম কৰি তেওঁলোকৰ মাহিলী আয় প্ৰায় ৭৮০০ টকা।
Continue Reading
