ডিজিটেল ডেস্কঃ ৰাম নৱমীৰ দিনা মধ্যপ্ৰদেশৰ এটা মন্দিৰৰ ছাদ ভাঙি মৃত্যু হৈছিল ৩৬ জনকৈ ভক্তৰ। এই ঘটনাৰ পিছত মন্দিৰৰ এটা অংশ স্থানীয় প্ৰশাসনে বুলডজাৰেৰে ভাঙি পেলাইছে। ইন্দোৰ পৌৰ নিগমে এক বৃহৎ আৰক্ষী বাহিনীৰ উপস্থিতিত মন্দিৰৰ অবৈধ নিৰ্মাণ সমূহ ধ্বংস কৰিছে। ৰাম নৱমীৰ দিনা সংঘটিত দুৰ্ঘটনাৰ পিছত মুখ্য পুৰোহিতজনে মন্দিৰ নিৰ্মাণৰ বিষয়ে প্ৰশ্ন উত্থাপন কৰিছিল।
ৰাম নৱমী উপলক্ষে ইন্দোৰৰ বিখ্যাত বেলেশ্বৰ মহাদেৱ ঝুলেলাল মন্দিৰত বহু সংখ্যক লোকে ভিৰ কৰিছিল। মন্দিৰৰ ভিতৰত এটা প্ৰাচীন কুঁৱা আছে। কুঁৱাটোৰ ওপৰত এখন ছাদ নিৰ্মাণ কৰা হৈছিল। বহুতে সেই ছাদত থিয় হৈ আছিল। ভিৰৰ হেঁচাত ছাদখন খহি ৩৬ জন লোকৰ মৃত্যু হৈছিল।
দুৰ্ঘটনাটোৰ কাৰণ অনুসন্ধানৰ বাবে এখন তদন্ত সমিতি গঠন কৰা হৈছিল। মন্দিৰৰ মুখ্য পুৰোহিত লক্ষ্মীনাৰায়ণ শৰ্মাই কৈছিল যে এক শক্তিশালী ভেটি নিৰ্মাণ নকৰাকৈ কুঁৱাটোৰ ওপৰত ছাদ নিৰ্মাণ কৰা হৈছিল। লগতে প্ৰশ্ন উত্থাপিত হৈছে মান ভক্তক একেলগে মন্দিৰত প্ৰৱেশ কৰিবলৈ কিয় অনুমতি দিয়া হৈছিল?
মন্দিৰৰ তত্বাৱধানৰ দায়িত্বত থকা ট্ৰাষ্টীৰ দুজন সদস্যৰ বিৰুদ্ধে এজাহাৰো দাখিল কৰা হৈছে।অনুসন্ধানৰ পিছত দেখা গৈছে যে এই ছাদখন প্ৰায় ৪০ বছৰ আগতে নিৰ্মাণ কৰা হৈছিল। যোৱা বছৰ স্থানীয় প্ৰশাসনে কৈছিল যে ছাদখন বিপজ্জনক হৈ পৰিছে। সেয়ে ছাদ খন ভাঙি পেলাব লাগে বুলি বহুতে কৈছিল। কিন্তু ট্ৰাষ্টী সদস্যসকলৰ বিৰোধিতাৰ বাবে সেয়া সম্ভৱ হোৱা নাছিল। শেহতীয়াকৈ প্ৰশাসনে বৃহৎ আৰক্ষী বাহিনীৰ উপস্থিতিত মন্দিৰৰ এটা অংশ ভাঙি পেলায়। ধৰ্মীয় অনুভূতিক আঘাত কৰাৰ সম্ভাৱনা থকাৰ বাবেই বৃহৎ আৰক্ষী বাহিনী মোতায়েন কৰা হৈছে বুলি প্ৰশাসনৰ এগৰাকী বিষয়াই প্ৰকাশ কৰিছে।
Continue Reading
