ডিজিটেল ডেস্ক: মধ্য প্ৰদেশৰ বেতুলত মঙলবাৰে সন্ধিয়া ব’ৰৱেলত পৰিল এটি সাত বছৰীয়া শিশু। শিশুটিক বচাবলৈ প্ৰায় ৪৮ ঘণ্টা ধৰি উদ্ধাৰ অভিযান চলি আছে। এই উদ্ধাৰ অভিযানৰ ওপৰত চকু ৰাখিছে মুখ্যমন্ত্ৰী শিৱৰাজ সিং চৌহানে। আত্মীয়ই জনোৱা মতে, শিশুটিৰ নাম তন্ময়, যিটো ব’ৰৱেলত শিশুটি পৰিল, সেই ব’ৰৱেলটো ৪০০ ফুট দ। তৃতীয় শ্ৰেণীৰ ছাত্ৰ তন্ময় । প্ৰায় ৩০-৩৫ ফুট গভীৰতাত বৰ্তমানো আবদ্ধ হৈ আছে তন্ময়।
তথ্য অনুসৰি ৪৮ ঘণ্টাৰ পৰা উদ্ধাৰ অভিযান অব্যাহত আছে। এতিয়া খন্দা বন্ধ কৰা হৈছে, লগতে সুৰংগ নিৰ্মাণৰ কামো আৰম্ভ কৰা হৈছে। সমান্তৰালকৈ জিলা উপায়ুক্ত আৰু আৰক্ষী অধীক্ষকে প্ৰশাসনিক কৰ্মচাৰীৰ লগতে স্থানত চকু ৰাখিছে।
মঙলবাৰে সন্ধিয়া প্ৰায় ৪:৩০ বজাত খেলপথাৰত ল’ৰা-ছোৱালীৰ সৈতে লুকাভাকু খেলি আছিল তন্ময়ে। তেনে সময়তে কণমানি শিশুটি ব’ৰৱেলত পৰিল। কোৱা হৈছে যে তেওঁ ৩৮ ফুটত আবদ্ধ হৈ আছে। তিনি-চাৰি বছৰ আগতে নানক চৌহান নামৰ এজন কৃষকৰ পথাৰত ৪০০ ফুট দ কৈ খনন কৰা হৈছিল ব’ৰৱেলটো, যিটো দুবছৰ ধৰি বন্ধ হৈ আছিল।
শিশুটিৰ দেউতাকে জানিবলৈ দিয়া তথ্য অনুসৰি সকলো ল’ৰা-ছোৱালীয়ে খেলি আছিল। খেলি থাকোঁতে ল’ৰা-ছোৱালীকেইটা নানক চৌহানৰ খেতিপথাৰ পাইছিল। য’ত এটা ব’ৰৱেল খোলা আছিল। তাতে উক্ত ঘটনাটো সংঘটিত হয়।তন্ময়ৰ খবৰে গাঁৱত আলোড়নৰ সৃষ্টি কৰিছে। দুখত ভাগি পৰিছে মাতৃ ভগ্নী আৰু সমগ্ৰ পৰিয়ালবৰ্গ।
( বি.দ্ৰ- ব’ৰৱেল হৈছে ১০০ৰ পৰা ১৫০০ ফুট দকৈ মাটিত ব’ৰ কৰা এটা খাদ। ৬ৰ পৰা ১২ ইঞ্চিৰ পিভিচি পাইপ ব্যৱহাৰ কৰি পাম্প ব্যৱহাৰ কৰি পানীখিনি উপৰিভাগলৈ অনা হয়। ব’ৰৰ পানী মাটিত সোমাই যোৱা ভূগৰ্ভস্থ পানীৰ পৰা আহে আৰু ভূগৰ্ভস্থ জলধাৰাত জমা হৈ থাকে)
Continue Reading
