ডিজিটেল ডেস্কঃ সমগ্ৰ বিশ্বৰ মানুহৰ মাজত ওজন বৃদ্ধিৰ সমস্যা সাধাৰণ হৈ পৰিছে। ওজন কমাবলৈ মানুহৰ অস্ত্ৰোপচাৰ কৰিবলগীয়া হয়। বহুতে এতিয়াও বৃদ্ধি পোৱা ওজনেৰে জীৱনটো কটাবলগীয়া হৈছে, আনহাতে বহুতৰে বাবে ই মৃত্যুৰ কাৰণো হৈ পৰিছে।
এজন ব্যক্তিৰ ওজন ৪৪৪ কেজিলৈ বৃদ্ধি পাইছিল। অস্ত্ৰোপচাৰ কৰাৰ সময়ত তেওঁৰ ওজন ১২০ কিলোগ্ৰাম কমি যায় যদিও হাৰ্ট এটেকত তেওঁৰ মৃত্যু হয়। ওজন বৃদ্ধিৰ বাবে তেওঁৰ জীৱনটো নানা সমস্যাৰে ভৰি পৰিছিল।
এই ব্যক্তিজনৰ নাম আছিল আন্দ্ৰেছ মৰেনো, যি মেক্সিকোৰ বাসিন্দা আছিল। তেওঁ এগৰাকী আৰক্ষী বিষয়া আছিল। তেওঁৰ ওজন অবিৰতভাৱে কমি আহিছিল যদিও চিকিৎসকৰ মতে আৱেগিক মানসিক চাপ আৰু হাৰ্ট এটেকৰ বাবে তেওঁৰ মৃত্যু হয়। আন্দ্ৰেছ মৰেনোৰ ওজন আছিল ৪৪৪ কিলোগ্ৰাম, যাৰ বাবে তেওঁক বিশ্বৰ আটাইতকৈ শকত মানুহ বুলি অভিহিত কৰা হৈছিল।
এটা স্বাভাৱিক শিশুৰ জন্মৰ সময়ত ওজন ২.৮ৰ পৰা ৩.২ কিলোগ্ৰাম থাকে যদিও আন্দ্ৰেছৰ জন্মৰ সময়ত তেওঁৰ ওজন আছিল ৫.৮ কিলোগ্ৰাম। তেওঁৰ বয়স ১০ বছৰ হওতে তেওঁৰ ওজন আছিল ৮২ কেজি।
আন্দ্ৰেছ মৰেনো আৰক্ষী বিষয়া হৈ কৰ্মজীৱনৰ পাতনি মেলিছিল আৰু পাছলৈ তেওঁ বিয়াও পাতিছিল। শকত হোৱা বাবে তেওঁৰ স্বাস্থ্যজনিত সমস্যা হ’বলৈ ধৰিলে আৰু তেওঁৰ অতিৰিক্ত ওজনৰ বাবে পত্নীয়ে তেওঁক এৰি থৈ গ’ল। পত্নীৰ সৈতে বিচ্ছেদৰ পিছত তেওঁৰ অৱস্থা বেয়া হৈ গৈ থাকিল। মৃত্যুৰ পূৰ্বে পত্নীৰ পৰা বিচ্ছেদ হোৱাৰ বাবে আৱেগিক মানসিক চাপত ভুগিছিল মৰেনো।
মৰেনোৰ ওজন বৃদ্ধিৰ লগে লগে তেওঁ বহুতো গুৰুতৰ ৰোগত আক্ৰান্ত হ’বলৈ ধৰিলে। অস্ত্ৰোপচাৰৰ পূৰ্বে মৰেনোৱে ফুটবল ছুপাৰষ্টাৰ ক্রিষ্টিয়ানো ৰোনাল্ডোৰ স্বাক্ষৰিত ৰিয়েল মাদ্রিদৰ চাৰ্ট লাভ কৰিছিল, যিয়ে তেওঁক ফিট হৈ থাকিবলৈ অনুপ্ৰাণিত কৰিছিল। তেওঁৰ ওজন কমাবলৈ বাইপাছ অস্ত্ৰোপচাৰ কৰা হৈছিল আৰু চিকিৎসকে তেওঁৰ পেটৰ ৭০ শতাংশ আঁতৰাই পেলাইছিল। আন্দ্ৰেছে মৃত্যুৰ পূৰ্বে দিনটোত ছটা এনাৰ্জি ড্ৰিংক সেৱন কৰিছিল, তাৰ পিছত হাৰ্ট এটেকত আক্ৰান্ত হৈ মৃত্যুবৰণ কৰে।
Continue Reading
