ডিজিটেল ডেস্কঃ মেচৰ প্ৰথম দিনটোৰ শেষত যেতিয়া তেওঁ খেলপথাৰৰ পৰা ড্ৰেছিং ৰুমলৈ খোজ কাঢ়ি গৈ আছিল, তেতিয়া তেওঁৰ চকুত উজ্বলি উঠিছিল সপোন। বিৰাট কোহলীয়ে নিজৰ ৫০০ সংখ্যক আন্তঃৰাষ্ট্ৰীয় মেচখন স্মৰণীয় কৰি তুলিব বিচাৰিছিল। সফল হয় তাৰকাগৰাকী।
প্ৰথম ইনিংছত শতক অৰ্জন কৰে বিৰাটে। টেষ্টত ২৯ নম্বৰ শতক অৰ্জন কৰিলে তেওঁ। তিনিওটা ফৰ্মেটতে ৭৬টাকৈ শতক আছে তেওঁৰ নাম।
বিৰাটে আন এক উদাহৰণ দাঙি ধৰিলে। আন্তঃৰাষ্ট্ৰীয় ক্ৰিকেটত সৰ্বাধিক ৰানৰ ক্ষেত্ৰত বিৰাটে পাঁচ নম্বৰ স্থানত উপনীত হৈছে। দক্ষিণ আফ্ৰিকাৰ প্ৰাক্তন ক্ৰিকেটাৰ জেক কালিছক অতিক্ৰম কৰে তেওঁ।
প্ৰথম দিনটোৰ শেষত বিৰাটে ৮৭ ৰানত অপৰাজিত আছিল। দ্বিতীয় দিনটোত শতক বনাবলৈ বেছি সময় নালাগিল। এই বছৰটো টেষ্টত দ্বিতীয়টো শতক অৰ্জন কৰে বিৰাটে। আহমেদাবাদত অনুষ্ঠিত বৰ্ডাৰ-গাওস্কাৰ ট্ৰফীত অষ্ট্ৰেলিয়াৰ বিৰুদ্ধে ১৮৬ ৰান ইনিংছ খেলিছিল।
দ্বিতীয় টেষ্টৰ প্ৰথম ইনিংছত যেতিয়া বিৰাটে বেটিং কৰিবলৈ ওলাই আহিছিল, তেতিয়া একেৰাহে চাৰিটা উইকেট হেৰুৱাই কিছু হেঁচাত পৰিছিল ভাৰত। বিৰাটে লাহে লাহে আৰম্ভ কৰিলে। আনটো মূৰত ৰবীন্দ্ৰ জাডেজাক লৈ তেওঁ ইনিংছ আগুৱাই নিছিল।
এই ইনিংছৰ ফলস্বৰূপে আন্তঃৰাষ্ট্ৰীয় ক্ৰিকেটত ৰানৰ ক্ষেত্ৰত বিৰাটে পাঁচ নম্বৰ স্থান দখল কৰিবলৈ সক্ষম হৈছে। ১০০ ৰান সংগ্ৰহ কৰি বিৰাটৰ ৫০০ মেচত ৰান সংখ্যা হৈছেগৈ ২৫,৫৬১ ৰান। ইমান দিনে কালিছ পাঁচ নম্বৰত আছিল। কালিছৰ ৫১৯খন মেচত আছে ২৫,৫৩৪ ৰানৰ সংখ্যা।
তালিকাৰ শীৰ্ষত আছে শচীন টেণ্ডুলকাৰ। আন্তঃৰাষ্ট্ৰীয় ক্ৰিকেটত ৬৬৪খন খেলত ৩৪,৩৫৭ ৰান সংগ্ৰহ কৰিছিল শচীনে। দ্বিতীয় স্থানত আছে শ্ৰীলংকাৰ প্ৰাক্তন অধিনায়ক কুমাৰ ছাংগাকাৰা। ৫৯৪খন মেচত তেওঁৰ ৰান ২৮,০১৬।
অষ্ট্ৰেলিয়াৰ প্ৰাক্তন অধিনায়ক ৰিকি পণ্টিঙে ৫৬০খন মেচত ২৭,৪৮৩ ৰান সংগ্ৰহ কৰি তৃতীয় স্থানত আছে। চতুৰ্থ স্থানত আছে শ্ৰীলংকাৰ আন এগৰাকী প্ৰাক্তন অধিনায়ক মহেলা জয়ৱৰ্ধনে। ৬৫২খন মেচত ২৫,৯৫৭ ৰান সংগ্ৰহ কৰে। অৰ্থাৎ বিৰাটে আৰু ৪০০ ৰান সংগ্ৰহ কৰিলে জয়ৱৰ্ধনে শীৰ্ষস্থান দখল কৰি চতুৰ্থ স্থানলৈ আহিব।
Continue Reading
