ডিজিটেল ডেস্কঃ মহিলাৰ সন্তান জন্ম দিয়াৰ বয়সৰ সীমা ভাঙিবলৈ আৰম্ভ কৰিছে। অৱশ্যে এই ক্ষেত্ৰত হলিউডৰ তাৰকাসকল আগশাৰীত আছে। মডেল নাওমি কেম্পবেল, ব্রিজিট নিলছন, গায়িকা মেডোনা, অভিনেত্ৰী ডায়েন কিটন, টেনিছ তাৰকা ছেৰেনা উইলিয়ামছ—তালিকাখন দীঘলীয়া৷
হলিউডৰ আন এগৰাকী প্ৰথম শ্ৰেণীৰ অভিনেত্ৰী কেমেৰন ডায়েজৰ নাম এইবাৰ সেই তালিকাত অন্তৰ্ভুক্ত হৈছে। ‘ভেনিলা স্কাই’ৰ নায়িকাগৰাকীয়ে ৫১ বছৰ বয়সত সন্তান জন্ম দিয়ে। কেমেৰন আৰু তেওঁৰ স্বামী বেঞ্জি মেডেনে নিজৰ ছ’চিয়েল মিডিয়াত নিজৰ পুত্ৰ কাৰ্ডিনেলৰ জন্মৰ খবৰ ঘোষণা কৰে।
এই খবৰটো ইনষ্টাগ্ৰামত শ্বেয়াৰ কৰি আনন্দ আৰু কৃতজ্ঞতা প্ৰকাশ কৰে দম্পতীহালে। শিশুটিৰ সুৰক্ষা আৰু গোপনীয়তাৰ বাবে কোনো ছবি পোষ্ট নকৰে বুলিও দম্পতীহালে উল্লেখ কৰে।
তেওঁলোকে লিখিছে, "আমাৰ পুত্ৰ কাৰ্ডিনেল মেডেনৰ জন্মৰ কথা ঘোষণা কৰি আমি ধন্য আৰু উৎসাহিত হৈছো। তেওঁ অসাধাৰণ আৰু আমি সকলোৱে ইমানেই সুখী যে তেওঁ ইয়াত আছে! ল'ৰা-ছোৱালীৰ সুৰক্ষা আৰু গোপনীয়তাৰ বাবে আমি কোনো ছবি পোষ্ট নকৰো। আমি বহুত ধন্য আৰু কৃতজ্ঞ অনুভৱ কৰিছো।’’
‘থেৰ’ছ ছামথিং এবাউট মেৰী’ আৰু ‘চাৰ্লিজ এঞ্জেলছ’ ছবিত অভিনয়ৰ বাবে পৰিচিত ডায়েজ আৰু গুড চাৰ্লট বেণ্ডৰ সদস্য মেডেনে ২০১৫ চনত বিবাহপাশত আবদ্ধ হয়।
Continue Reading
