ডিজিটেল ডেস্কঃ শ্বাহিদ কাপুৰ আৰু কৃতি সেনন অভিনীত ছবি তেৰী বাটো মে এইছা উলঝা জিয়াই অৱশেষত আজি চিনেমাগৃহত মুক্তি লাভ কৰিলে। ছবিখন সন্দৰ্ভত অনুৰাগীৰ মাজত উত্তেজনাৰ সৃষ্টি হৈছে। ছ’চিয়েল মিডিয়াৰ পৰা সমালোচকলৈকে ছবিখনক লৈ যোগাত্মক মতামত দিয়া দেখা গৈছে। শ্বাহিদ আৰু কৃতিৰ উপৰিও বলীউডৰ হিমেন ধৰ্মেন্দ্ৰকো ছবিখনত দেখা গৈছে। কিন্তু এই ছবিখনত অভিনেতাগৰাকীক ধৰ্মেন্দ্ৰ হিচাপে নহয় অন্য এটা নামৰে কৃতিত্ব দিয়া দেখা গৈছে।
হয়, বলীউডত প্ৰৱেশ কৰাৰ ৬৪ বছৰৰ পাছত ধৰ্মেন্দ্ৰই নাম সলনি কৰিছে। হিন্দুস্তান টাইমছৰ তথ্য অনুসৰি শ্বাহিদ কাপুৰ আৰু কৃতি সেননৰ ছবি তেৰী বাটো মে এইছা উলঝা জিয়াত ধৰ্মেন্দ্ৰ সিং দেওলৰ নামৰে ধৰ্মেন্দ্ৰক কৃতিত্ব দিয়া হৈছে। উল্লেখ্য যে ধৰ্মেন্দ্ৰৰ শৈশৱৰ নাম ধৰম সিং দেওল। এই ছবিখনৰ পূৰ্বে ধৰ্মেন্দ্ৰই নিজৰ নামৰ আগত বা পাছত কোনো উপাধি ব্যৱহাৰ কৰা নাছিল।
ধৰ্মেন্দ্ৰৰ ৱৰ্ক ফ্ৰণ্টৰ কথা যদি উল্লেখ কৰোঁ তেন্তে তেৰী বাটো মেই এইছা উলঝা জিয়া তেওঁৰ শেহতীয়া ছবি। এই ছবিখনৰ পূৰ্বে অভিনেতাগৰাকীক কৰণ জোহৰৰ ৰকী ঔৰ ৰাণী কি প্ৰেম কাহানীত দেখা গৈছিল। এই ছবিখনত ধৰ্মেন্দ্ৰই ৰণবীৰ সিঙৰ ককাকৰ চৰিত্ৰত অভিনয় কৰিছিল। এই ছবিখনত ধৰ্মেন্দ্ৰই ৮৭ বছৰ বয়সত এটা চুমা খোৱাৰ দৃশ্য শ্বুটিং কৰিছিল।বহু চৰ্চিত ছবিখনত তেওঁ শ্বাবানা আজমীৰ সৈতে চুম্বন কৰিছিল।
Continue Reading
