ডিজিটেল ডেস্কঃ ডেৰ মাহৰ পিছত আৰম্ভ হ’ব আই পি এল। সেই প্ৰতিযোগিতাত তেওঁক পুনৰ দেখা যাব চিনাকি ৭ নম্বৰৰ জাৰ্চি পিন্ধি। শেহতীয়াকৈ চেন্নাই ছুপাৰ কিংছ (চি এছ কে)ৰ জাৰ্চি উন্মোচন কৰা হৈছে য’ত তেওঁৰ নাম লিখা আছে। আই পি এলৰ পূৰ্বে মহেন্দ্ৰ সিং ধোনীয়ে ৭ নম্বৰক কিয় ইমান ভাল পায় তাৰ কাৰণ উল্লেখ কৰিছিল। চি এছ কেৰ অধিনায়কগৰাকীয়ে লগতে কয় যে তেওঁ কিয় ৭ নম্বৰটো পছন্দ কৰে।
ক্ৰিকেটত শচীন টেণ্ডুলকাৰৰ সৈতে যেনেকৈ ১০ নম্বৰৰ সম্পৰ্ক আছে, ঠিক তেনেদৰে ৭ নম্বৰৰ সৈতে ধোনীৰ অবিচ্ছেদ্য সম্পৰ্ক আছে। চেন্নাইৰ অনুৰাগীসকল তেওঁক লৈ বৰ পাগল। বহুতে ভাৰতীয় দলৰ পৰা ৭ নম্বৰৰ জাৰ্চি প্ৰত্যাহাৰ কৰিবলৈ দাবী জনাইছে।
শুকুৰবাৰে এক অনুষ্ঠানত ভাষণ দি ধোণীয়ে কয়, ‘সেই সময়তে মোৰ পিতৃ-মাতৃয়ে মোক পৃথিৱীলৈ আনিছিল। মোৰ জন্ম হৈছিল জুলাই মাহৰ ৭ তাৰিখে। জুলাই মাহতো সপ্তম মাহ। মোৰ জন্ম বছৰৰ শেষৰ দুটা সংখ্যা ৮১। ৮ ৰ পৰা ১ বিয়োগ কৰিলে ৭ পোৱা যায়। গতিকে যেতিয়া মোক প্ৰথমবাৰৰ বাবে সোধা হৈছিল, ‘আপুনি কি নম্বৰৰ জাৰ্চি বিচাৰে’, তেতিয়া মোৰ উত্তৰ আছিল অতি সহজ।"
অহা মাহত পুনৰ খেলপথাৰত দেখা যাব ধোনীক। তেওঁ চি এছ কেৰ ষষ্ঠ ট্ৰফী লাভ কৰাৰ লক্ষ্য ৰাখিব। ভাৰতৰ প্রাক্তন অধিনায়কগৰাকীয়েও প্রস্তুতি আৰম্ভ কৰিছে৷
Continue Reading
