ডিজিটেল ডেস্কঃ মানুহৰ জীৱন ৰক্ষা কৰাত নাৰ্ছে মুখ্য ভূমিকা গ্ৰহণ কৰা দেখা যায়। কিন্তু এগৰাকী ঘাতক নাৰ্ছৰ কথা শুনিলে আপুনি আচৰিত হৈ পৰিব। এই নাৰ্ছগৰাকীয়ে এটা নহয়, দুটা নহয়, ৭টাকৈ নৱজাত শিশু হত্যা কৰিছে। শুকুৰবাৰে উত্তৰ ইংলেণ্ডৰ এখন চিকিৎসালয়ৰ নাৰ্ছগৰাকীক ৭টা কেঁচুৱাক হত্যা কৰাৰ লগতে আন ছটা কেঁচুৱাক হত্যাৰ চেষ্টা কৰাৰ অপৰাধত দোষী সাব্যস্ত কৰা হয়। ৩৩ বছৰীয়া নাৰ্ছগৰাকীৰ নাম লুচি লেটবি।
তেওঁৰ বিৰুদ্ধে ২০১৫ চনৰ পৰা ২০১৬ চনৰ ভিতৰত উত্তৰ-পশ্চিম ইংলেণ্ডৰ কাউণ্টেছ অৱ চেষ্টাৰ হাস্পতালত কাম কৰি থকাৰ সময়তে সাতটা কেঁচুৱা (পাঁচটা ল’ৰা আৰু দুগৰাকী ছোৱালী) হত্যা কৰাৰ অভিযোগ উত্থাপন হৈছে, আনহাতে আন ছয়জন তেওঁৰ হাতত আহত হৈছিল। কোনো শিশুৰ পেটত বায়ু সোমোৱাই আৰু কোনো শিশুক ইনচুলিনৰ বেজী দি হত্যা কৰে নাৰ্চগৰাকীয়ে।
অৱশ্যে নাৰ্ছগৰাকীয়ে সকলো অভিযোগ অস্বীকাৰ কৰিছে। নাৰ্চগৰাকীৰ এই জঘন্য কাণ্ড পোহৰলৈ অহাত সহায় কৰে ভাৰতীয় মূলৰ শিশু চিকিৎসক ৰবি জয়ৰামে। লুচি লেটবিৰ ঘৰত তালাচী চলাওতে আৰক্ষীয়ে এটা টোকা উদ্ধাৰ কৰে। য'ত লিখা আছিল ''মই দুষ্ট আত্মাৰ মানুহ...মই এইবোৰ কৰিছো।''
পাছে লুচিয়ে এই কথাটো এই ঘটনাৰ লগত জড়িত হৈ লিখা নাই বুলি আৰক্ষীক বুজাবলৈ যত্ন কৰিছিল।
শুকুৰবাৰে মানচেষ্টাৰ ক্রাউন ক’ৰ্টৰ জুৰীয়ে নাৰ্ছ লুচি লেটবিক সাতটা নৱজাতকক হত্যা কৰাৰ লগতে আন ছটাক হত্যা কৰাৰ চেষ্টা কৰাৰ দোষী সাব্যস্ত কৰে। সোমবাৰে এই আদালতত তেওঁক শাস্তি প্ৰদান কৰা হ’ব।
Continue Reading
