ডিজিটেল ডেস্কঃ দেশৰ প্ৰগতি কি হৈছে সেয়া পিছৰ কথা। প্ৰগতি হওঁক বা নহওঁক, চৰকাৰী আঁচনিৰ কথা ঢাক-ঢোল বজাই প্ৰচাৰ কৰাটো প্ৰয়োজনীয় কথা। এই বিষয়ত মুঠেও পিছ পৰি থকা নাই মোদীৰ চৰকাৰ। মোদীৰ চৰকাৰৰ দিনত গ্ৰহণ কৰা বেটী বচাওঁ , বেটী পঢ়াও আঁচনিৰ বাবে বিজ্ঞাপনত যিমান ধন খৰচ কৰা হৈছে তাৰ তুলনাত কন্যা সন্তানৰ বাস্তৱিক বিকাশৰ বাবে অতি কম পৰিমাণৰ ধনহে খৰচ কৰা হৈছে।
সেয়ে কেৱল বিজ্ঞাপনৰ মাজেৰেই চলি থকা আঁচনি খনক লৈ আনকি আদালতেও ক্ষোভ প্ৰকাশ কৰিছিল। যিকি নহওঁক, শেহতীয়াকৈ তথ্য আৰু সম্প্ৰচাৰ মন্ত্ৰী অনুৰাগ ঠাকুৰে লোকসভাত সংসদৰ শীতকালীন অধিৱেশনৰ সময়ত প্ৰকাশ কৰে যে ২০১৪ চনত ভাৰতীয় জনতা পাৰ্টি (বিজেপি) শাসনলৈ অহাৰ পিছত কেন্দ্ৰই প্ৰিণ্ট আৰু ইলেক্ট্ৰনিক মাধ্যমত বিজ্ঞাপন প্ৰদানৰ নামত ৬,৪৯১.৫৬ কোটি টকা ব্যয় কৰিছে।
এইক্ষেত্ৰত চৰকাৰে ইলেক্ট্ৰনিক মাধ্যমত বিজ্ঞাপনৰ বাবে ৩,২৬০.৭৯ কোটি টকা ব্যয় কৰিছিল আৰু আঠ বছৰৰ সময়ছোৱাত প্ৰিণ্ট মিডিয়াত ৩,২৩০.৭৭ কোটি টকা ব্যয় কৰা হৈছে।
মন্ত্ৰীগৰাকীয়ে প্ৰকাশ কৰা তথ্যই প্ৰিণ্ট মিডিয়া আৰু ইলেক্ট্ৰনিক মাধ্যমত যোৱা তিনি বছৰত বিজ্ঞাপনৰ ব্যয় হ্ৰাস হোৱা দেখুৱাইছে।মন্ত্ৰীগৰাকীয়ে চিপিআইৰ সাংসদ মুনিয়ান চেলভাৰাজৰ এক প্ৰশ্নৰ উত্তৰ দি এই তথ্য প্ৰকাশ কৰে ।
ইলেক্ট্ৰনিক মাধ্যমত চৰকাৰে ২০১৬-১৭ বিত্তীয় বৰ্ষত সৰ্বাধিক ব্যয় কৰিছিল । সেই সময়ত এই ধনৰ পৰিমাণ আছিল ৬০৯.১৫ কোটি টকা। ইয়াৰ পিছত ২০১৫-১৬ বৰ্ষত ৫৩১.৬০ কোটি টকা আৰু ২০১৮-১৯ বৰ্ষত ৫১৪.২৮ কোটি টকা ব্যয় কৰা হৈছিল বুলি ঠাকুৰে কয়। চলিত বৰ্ষৰ ৭ ডিচেম্বৰলৈকে চৰকাৰে ইলেক্ট্ৰনিক মাধ্যমত ৭৬.৮৪ কোটি টকাৰ বিজ্ঞাপন প্ৰকাশ কৰিছে।
প্ৰিণ্ট মিডিয়াত বিজ্ঞাপনৰ ব্যয় সন্দৰ্ভত মন্ত্ৰীগৰাকীয়ে কয় যে ২০১৭-১৮ বৰ্ষত চৰকাৰে ৬৩৬.০৯ কোটি টকা ব্যয় কৰা হৈছিল। ইয়াৰ পিছত ৫০৮.২২ কোটি টকা ২০১৫-১৬ বৰ্ষত আৰু ২০১৬-১৭ বৰ্ষত ৪৬৮.৫৩ কোটি টকা বিজ্ঞাপনত খৰচ কৰা হৈছিল। চলিত বৰ্ষৰ ৭ ডিচেম্বৰলৈকে চৰকাৰে প্ৰিণ্ট মিডিয়াত বিজ্ঞাপনত ৯১.৯৬ কোটি টকা ব্যয় কৰিছে। সকলো ব্যয় চৰকাৰে কেন্দ্ৰীয় যোগাযোগ ব্যুৰোৰ জৰিয়তে বহন কৰিছে বুলিও ঠাকুৰে কয়।
Continue Reading
