ডিজিটেল ডেস্কঃ জীৱনৰ বিয়লি বেলা নিঃসংগতাত ভোগা এগৰাকী ৮০ বছৰীয়া বৃদ্ধা৷ পুত্ৰ-বোৱাৰী, নাতি-নাতিনীৰ মৰমৰ বাবে আতুৰ এগৰাকী বৃদ্ধা৷ কিন্তু মৰমৰ সলনি তেওঁ পাইছে মাথো ককৰ্থনা, শাৰীৰিক অত্যাচাৰ৷ কেৰালাৰ ৮০ বছৰীয়া বৃদ্ধাগৰাকীক তেওঁৰ বোৱাৰীয়েকে চলোৱা নিৰ্মম শাৰীৰিক, মানসিক অত্যাচাৰৰ কাহিনী শেহতীয়াকৈ পোহৰলৈ আহিছে৷ দক্ষিণ কেৰালাৰ বাসিন্দা ৮০ বছৰীয়া বৃদ্ধা লিয়াম্মা থমাছক তেওঁৰ ৩৭ বছৰীয়া বোৱাৰীয়েক মঞ্জু থমাছে চলোৱা অত্যাচাৰৰ এটা ভিডিঅ' সামাজিক মাধ্যমত ভাইৰেল হৈ পৰাৰ পিছতে প্ৰতিক্ৰিয়াৰ সৃষ্টি হৈছে৷
ভিডিঅ'টোৱে বহুতৰে হৃদয় কঁপাই তুলিছে। ভিডিঅ'টোত বোৱাৰীয়েকে বৃদ্ধাগৰাকীক চকীৰ পৰা বগৰাই দি অত্যাচাৰ চলোৱা দেখা গৈছে৷ মানুহে ভাইৰেল ভিডিঅ' চাই বোৱাৰীয়েকৰ বিৰুদ্ধে ক্ষোভ উজাৰি দিছে৷ একে সময়তে কেৰালা মহিলা আয়োগেও এই বিষয়ত গুৰুত্ব আৰোপ কৰিছে। ছ'চিয়েল মিডিয়াত মানুহে বৃদ্ধাগৰাকীৰ প্ৰতি যথেষ্ট সমবেদনা প্ৰকাশ কৰিছে।
সমাজত বৃদ্ধসকলৰ প্ৰতি উৎপীড়নৰ ঘটনা বাঢ়ি আহিছে। এই ধৰণৰ আচৰণ সামাজিক বিকাৰগ্ৰস্ততাৰে লক্ষণ বুলি ক’ব পাৰি। ভিডিঅ'টো ভাইৰেল হোৱাৰ পিছতে কেৰালা আৰক্ষীয়ে বোৱাৰীয়েকৰ বিৰুদ্ধে ব্যৱস্থা গ্ৰহণ কৰিছে৷অভিযুক্ত মঞ্জু থমাছক ইতিমধ্য আৰক্ষীয়ে নিজৰ জিম্মাত লৈছে৷ জানিব পৰা মতে মঞ্জু থমাছে দীৰ্ঘদিন ধৰি তেওঁৰ শাহুৱেকক অত্যাচাৰ কৰি আহিছিল। অভিযুক্ত মঞ্জু থমাছ এগৰাকী চৰকাৰী বিদ্যালয়ৰ শিক্ষয়িত্ৰী৷
Continue Reading
