ডিজিটেল ডেস্কঃ ৰাজস্থানৰ ৰাজধানী জয়পুৰ চহৰত পুনৰ এবাৰ তীব্ৰবেগী বাহনৰ দৌৰাত্ম্যই প্ৰাণ কাঢ়িলে এজন পথপথৰ বেপাৰীক ।
চহৰখনৰ এক ব্যস্ত পথৰ কাষৰ ফুটপাথত শাক-পাচলি বিক্ৰী কৰি থকা এজন যুৱকক এখন তীব্ৰবেগী বিলাসীবহুল গাড়ীয়ে নিয়ন্ত্ৰণ হেৰুৱাই মহতিয়াই লৈ যায়। এই সমগ্ৰ মৰ্মান্তিক দৃশ্য ওচৰৰে এটা চিচিটিভি (CCTV) কেমেৰাত আৱদ্ধ হৈছে।
তথ্য অনুসৰি, ঘটনাটো জয়পুৰৰ এক জনবহুল অঞ্চলত সংঘটিত হৈছে। প্রতিদিনৰ দৰেই এজন যুৱকে পথৰ কাষৰ ফুটপাথত বহি শাক-পাচলি বিক্ৰী কৰি আছিল। তেনে সময়তে বিপৰীত দিশৰ পৰা অহা এখন দ্ৰুতবেগী বাহনে হঠাতে নিয়ন্ত্ৰণ হেৰুৱাই পোনপটীয়াকৈ যুৱকজনক খুন্দা মাৰে। খুন্দাটো ইমানেই প্ৰচণ্ড আছিল যে যুৱকজন কেইবাফুট দূৰলৈ চিটিকি পৰে আৰু থিতাতে গুৰুতৰভাৱে আঘাতপ্ৰাপ্ত হয়।
উক্ত দুৰ্ঘটনাটোৰ চিচিটিভি ফুটেজ বৰ্তমান ছচিয়েল মিডিয়াত ভাইৰেল হৈ পৰিছে। ভিডিঅ’টোত দেখা গৈছে যে যুৱকজনে নিজৰ গ্ৰাহকৰ বাবে শাক-পাচলি বিক্ৰী কৰাত ব্যস্ত আছিল। তেনে সময়তে কালৰূপী গাড়ীখনে পলকতে তেওঁক মহতিয়াই লৈ যায়। ওচৰতে থকা লোকসকলে লগে লগে ঘটনাস্থলীত উপস্থিত হৈ যুৱকজনক উদ্ধাৰ কৰিবলৈ যত্ন কৰে।
দুৰ্ঘটনাৰ খবৰ পোৱাৰ লগে লগে স্থানীয় আৰক্ষী ঘটনাস্থলীত উপস্থিত হয়। আঘাতপ্ৰাপ্ত যুৱকজনক ততাতৈয়াকৈ ওচৰৰে এখন চিকিৎসালয়ত ভৰ্তি কৰোৱা হয়। বৰ্তমান তেওঁৰ অৱস্থা সংকটজনক বুলি চিকিৎসালয় সূত্ৰই প্ৰকাশ কৰিছে। আৰক্ষীয়ে দুৰ্ঘটনাগ্ৰস্ত বাহনখন জব্দ কৰিছে আৰু চালকজনৰ বিৰুদ্ধে এখন এজাহাৰ ৰুজু কৰি তদন্ত আৰম্ভ কৰিছে।
এই ঘটনাই চহৰখনত তীব্ৰ চাঞ্চল্যৰ সৃষ্টি কৰিছে। একাংশ সচেতন নাগৰিকে অভিযোগ কৰিছে যে চহৰৰ ভিতৰত একাংশ চালকে অত্যাধিক বেগত গাড়ী চলোৱাৰ বাবে এনেধৰণৰ শোকাৱহ দুৰ্ঘটনা সততে সংঘটিত হৈ আহিছে। পথ সুৰক্ষাৰ নিয়ম উলংঘা কৰা চালকসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে স্থানীয় ৰাইজে।
Continue Reading
