ডিজিটেল ডেস্কঃ মৰিগাঁও জিলাৰ ভূৰাগাঁৱৰ এটি খহনীয়া বিধ্বস্ত পৰিয়াললৈ এটি মৰ্মান্তিক পথ দূৰ্ঘটনাই অন্ধকাৰ নমাই আনিলে। এবাৰ,দুবাৰ নহয় ৬-৭ বাৰ ব্ৰহ্মপুত্ৰৰ খহনীয়াত ঘৰ ভেটি সকলো হেৰুওৱা এটি পৰিয়ালৰ কৰুণ গাঁথা।
সোমবাৰে পুৱাই মৰিগাঁৱত সংঘটিত হয় শোকাবহ পথ দুৰ্ঘটনাটো
ভূৰাগাঁও ৰাজহ চক্ৰৰ অন্তৰ্গত লেঙেৰিবড়ী গাঁৱত খহনীয়াত সকলো হেৰুৱাই বিধ্বস্ত অনুৰাম ডেকাৰ দূৰ্ভগীয়া পৰিয়ালটোৱে অকণমান মাটিৰ ব্যৱস্হা কৰি আশ্ৰয় লৈছিল গৈ জাগীৰোডৰ শৰতপাৰাত। পিতৃ মাতৃয়ে দুই সন্তানক বুকুত সাৱটি আৰম্ভ কৰিছিল নতুন যাত্ৰা। পৰিয়ালটো পোহপাল দিয়াৰ তাগিদাত ২১ বছৰীয়া বৰ পুত্ৰ মানৱ জ্যোতিয়ে এখন ট্ৰাকৰ চালক হিচাপে কৰ্ম জীৱন আৰম্ভ কৰিছিল। কিন্তু নিয়তিৰ কৰুণ পৰিহাসত আজি সেয়াও শেষ হৈ গ'ল।
আজি পুৱা মানৱ জ্যোতিয়ে AS01P 0597 নম্বৰৰ ট্ৰাক খন লৈ মৰিগাঁও চহৰৰ পৰা নগাঁও অভিমুখে গৈ থকা অৱস্হাত ট্ৰাক খনৰ যান্ত্ৰিক বিজুতি ঘটে। প্ৰাণৰ মমতাত মানৱে চালকৰ চিটৰ পৰা জপিয়াই প্ৰাণ ৰক্ষাৰ চেষ্টা কৰে যদিও নিজৰ ট্ৰাকৰ চকাৰ তলতে সোমাই থিতাতে নিহত হয় ।
ট্ৰাক খনে আশে পাশে থকা কেইবাখনো দুকান ক্ষতিগ্ৰস্ত কৰি এখন ট্ৰেভেলাৰত খুন্দা মাৰে। এতিয়া খহনীয়া বিধ্বস্ত পৰিয়ালটো অন্ধকাৰৰ গৰাহত। হেৰুৱাবলৈ অনুৰাম ডেকাৰ পৰিয়ালটোৰ বাবে আৰু যেন একো নাথাকিল। মৰ্মান্তিক দূৰ্ঘটনাটোৱে অঞ্চলজুৰি শোকৰ ছাঁ পেলাইছে।
Continue Reading
