পুনৰ বহিঃৰাজ্যত অসমৰ যুৱকক নিৰ্যাতন

ডিজিটেল ডেস্কঃ পুনৰ বহিঃৰাজ্যত অসমৰ যুৱকক নিৰ্যাতন চলোৱাৰ এটা ঘটনা পোহৰলৈ আহিছে। এই নিৰ্যাতনৰ ঘটনাত এজন অসমীয়া যুৱকৰ কৰুণ মৃত্যু ঘটাৰ লগতে কথমপি প্ৰাণ ৰক্ষা পৰে আন এজন যুৱকৰ। 

বিগত চাৰিবছৰে বেংগালুৰুৰ এটা কোম্পানীত কৰ্মৰত অৱস্থাত থকা গোলাঘাট জিলাৰ মেৰাপানী আৰক্ষী থানাৰ অন্তৰ্গত আদৰ্শ গাঁৱৰ এজন যুৱক আৰু যোৰহাট জিলাৰ বৰহোলা অঞ্চলৰ এজন যুৱকক ১২ নৱেম্বৰত বেংগালুৰুত অচিনাক্ত লোকৰ দলে মাৰপিট কৰি গুৰুতৰ ভাবে আঘাটপ্ৰাপ্ত কৰে।

বহিঃৰাজ্যত নিৰ্যাতনৰ বলি হৈ মেৰাপানী আদৰ্শ গাঁৱৰ প্ৰবিন গগৈ আৰু বৰহোলাৰ সমুজ্বল শইকীয়া নামৰ যুৱক দুজন বেংগালুৰুৰ পৰা ৰেলেৰে গুৱাহাটীলৈ আহে। ৰেলত আহি থাকোতে বিহাৰৰ বিজাপুৰ ৰেলষ্টেচনত পানী আনিবলৈ বুলি সমুজ্বল শইকীয়া নামৰ যুৱকজন ৰেলৰ পৰা নামি যায় আৰু তেনে সময়তে ৰেলগাড়ীখনে ষ্টেচন এৰে। 

পাছত সমুজ্বল শইকীয়াই ষ্টেচনতে থাকি অহাৰ বিষয়ে ফোনযোগে সহযোগী প্ৰবিন গগৈক জানিবলৈ দিয়ে। কিন্তু শুক্ৰবাৰে বিহাৰৰ এটা ৰেলষ্টেচনৰ পৰা ৰেলৱে আৰক্ষীয়ে ফোনযোগে প্ৰবিনক অৱগত কৰে যে সমুজ্জলৰ মৃতদেহ উদ্ধাৰ হৈছে ৰেল ষ্টেচনৰ সমীপত। পাছত প্ৰবিন গগৈয়ে যেনে-তেনে গুৱাহাটীত উপস্থিত হোৱাত অন্যলোকৰ সহায়ত গুৱাহাটীৰ পৰা ফৰকাটিং জংচনত উপস্থিত হয় ।

মুৰ, চকু আৰু পিঠিত গুৰুতৰ ভাবে আঘাট পোৱা প্ৰবিন গগৈ বৰ্তমানে গোলাঘাট কুশল কোঁৱৰ অসামৰিক চিকিৎসালয়ত চিকিৎসা কৰি কিছু সুস্থ হৈ উঠিছে। ইফালে, সমুজ্বল শইকীয়াৰ পৰিয়ালৰ লোকে সমুজ্বল শইকীয়াৰ মৃতদেহ ঘৰলৈ আনি সৎকাৰ কৰে বুলি জানিব পৰা গৈছে।