ম'বাইল এপেৰে ভোটদান কৰা ভাৰতৰ প্ৰথম ৰাজ্য হ'ল বিহাৰ

ডিজিটেল ডেস্কঃ শনিবাৰে বিহাৰ হৈ পৰিল ই-ভোটিং কৰা ভাৰতৰ প্ৰথমখন ৰাজ্য। শনিবাৰে বিহাৰৰ ২৬খন জিলাৰ ৪২খন পৌৰসভা/নিগমৰ নিৰ্বাচনত e-SECBHR আৰু C-DAC এপৰ যোগেদি ম'বাইল ফ'ন ব্যৱহাৰ কৰি দেশ-বিদেশত থকা বহু বিহাৰী ভোটাৰে ভোটদান কৰে।

তেনেদৰে ম'বাইল এপেৰে ভোটদান কৰি দেশৰ প্ৰথম মহিলা আৰু পুৰুষ হৈ পৰিল বিহাৰৰ পূব চম্পাৰণ জিলাৰ বিভা দেৱী আৰু মুন্না কুমাৰ। বিহাৰত ৬টা পৌৰসভাত নির্বাচন তথা ৩৬টা ৱাৰ্ডত উপ-নির্বাচন হৈছে। ৰাজ্যখনৰ নিৰ্বাচন আয়োগৰ মতে পঞ্জীয়ন কৰা এনে ২,৯৪,৭১৯জন ভোটাৰৰ ৬৯.৪৯ শতাংশই শনিবাৰে ২৬খন জিলাৰ ৪৮৯টা ভোটগ্রহণ কেন্দ্রত ই ভোটিং কৰে। বাতৰি মতে ডুবাই আৰু কাটাৰত থকা প্ৰৱাসী বিহাৰী লোকেও শনিবাৰে ই-ভোটিঙৰ জৰিয়তে ভোটদান প্রক্রিয়াত অংশগ্ৰহণ কৰে। উল্লেখযোগ্য যে এনে ভোটদানৰ বাবে ৰাজ্যখনত পঞ্জীয়নৰ শেষ দিন আছিল ২২ জুন। উল্লেখযোগ্য যে বিহাৰৰ বাহিৰত থকা বিহাৰী লোকৰ উপৰি ভোটকেন্দ্ৰলৈ যাবলৈ অক্ষম লোকেও এই সুবিধা গ্রহণ কৰে।

উৎসঃ দৈনিক জনমভূমি