ডিজিটেল ডেস্কঃ উত্তৰ প্ৰদেশৰ লক্ষ্ণৌস্থিত চৌধুৰী চৰণ সিং আন্তঃৰাষ্ট্ৰীয় বিমানবন্দৰত ডাইৰেক্টৰেট অৱ ৰিভেনিউ ইণ্টেলিজেন্সে (DRI) এক বৃহৎ অভিযান চলাই এক আন্তঃৰাষ্ট্ৰীয় ড্ৰাগছ সৰবৰাহকাৰী চক্ৰক কৰায়ত্ব কৰিবলৈ সক্ষম হৈছে। বেংককৰ পৰা অহা এদল সৰবৰাহকাৰীৰ পৰা কোটি টকা মূল্যৰ নিষিদ্ধ ড্ৰাগছ জব্দ কৰা হৈছে।
তথ্য অনুসৰি, DRI-ৰ ওচৰত আগতীয়াকৈ খবৰ আছিল যে থাইলেণ্ডৰ বেংককৰ পৰা এটা বৃহৎ ড্ৰাগছৰ চালান লখনউ অভিমুখে আহি আছে। এই তথ্যৰ ভিত্তিত বিমানবন্দৰত নিৰাপত্তা ব্যৱস্থা কটকটীয়া কৰা হৈছিল আৰু সন্দেহযুক্ত যাত্ৰীসকলৰ ওপৰত চোকা নজৰ ৰখা হৈছিল।
বেংককৰ পৰা অহা বিমানখনৰ যাত্ৰীসকলক তালাচী চলাই থকাৰ সময়তে কেইজনমান যাত্ৰীৰ গতি-বিধি দেখি বিষয়াৰ সন্দেহ ওপজে। তেওঁলোকৰ হাতত থকা বেগসমূহ স্কেনিং মেচিনত পৰীক্ষা কৰাৰ লগতে তন্ন তন্নকৈ তালাচী চলোৱাত বেগৰ ভিতৰত অতি চতুৰতাৰে তৈয়াৰ কৰা গোপন কক্ষ উদ্ধাৰ হয়। তাৰ ভিতৰতে পেকেট কৰি ভৰাই থোৱা আছিল কোটি টকা মূল্যৰ মাৰাত্মক ড্ৰাগছ।
বৰ্তমান DRI-য়ে আটক কৰা সৰবৰাহকাৰী কেইজনক জেৰা চলাই আছে। তেওঁলোক এই আন্তঃৰাষ্ট্ৰীয় ছিণ্ডিকেটৰ কিমান গুৰুত্বপূৰ্ণ সদস্য আৰু ভাৰতত এই ড্ৰাগছ কাৰ হাতলৈ যোৱাৰ কথা আছিল, সেই বিষয়ে অধিক তথ্য সংগ্ৰহ কৰা হৈছে। এই কাণ্ডত স্থানীয় কোনো লোক জড়িত থকাৰ সম্ভাৱনাও নুই কৰিব নোৱাৰি।
Continue Reading
