যৌৱনে আমনি কৰে-২ৰ পোষ্টাৰ আৰু গীত মুকলি

ডিজিটেল ডেস্কঃ অৱশেষত প্রতীক্ষাৰ অৱসান। মুকলি হ'ল নতুন অসমীয়া ছবি “যৌৱনে আমনি কৰে-২”ৰ গীত আৰু পোষ্টাৰ । জ্যোতি চিত্ৰবনৰ ৰুদ্ৰ বৰুৱা প্রেক্ষাগৃহত আয়োজিত অনুষ্ঠানত ছবিখনৰ পোষ্টাৰৰ লগতে প্ৰথমটো গীত উন্মোচন।

সংগীত পৰিচালক পলাশ সূর্য গগৈয়ে ৰচনা আৰু সুৰাৰোপ কৰা "ৰহেদৈ ৰচকী” শীৰ্ষক গীতটিত কণ্ঠদান কৰিছে দীক্ষু আৰু চয়নিকাই।

লক্ষ্মী নাৰায়ণ ফিল্মছৰ বেনাৰত অশোক কুমাৰ বিষয়া আৰু হেপীমণি বিষয়াই প্রযোজনা কৰা "যৌৱনে আমনি কৰে-২” অহা ১০ অক্টোবৰত অসমৰ সকলো চিত্ৰগৃহত মুক্তিলাভ কৰিব।

ছবিখনৰ পৰিচালক অশোক কুমাৰ বিষয়া আৰু সহযোগী পৰিচালক বৰষাৰাণী বিষয়া।চিত্রনাট্য আৰু সংলাপ প্ৰণৱ কুমাৰ বৰুৱা আৰু বৰষাৰাণী বিষয়াৰ।ছবিখনৰ কাৰ্যবাহী প্রযোজক ভাস্কৰ বৰুৱা। ১৯৯৮ চনত মুক্তিলাভ কৰা "যৌৱনে আমনি কৰে” আছিল অসমৰ সর্বকালৰ ব্যৱসায় সফল ছবি ।সেইখন ছবিৰ মুক্তিৰ ২৭ বছৰ পিছত পুনৰ পৰিচালক অশোক কুমাৰ বিষয়াই সাজু কৰি তুলিছে "যৌৱনে আমনি কৰে”ৰ ছিকুৱেল।

পূৰ্বৰ ছবিখনত অভিনয় কৰা প্রাঞ্জল শইকীয়া, নিকুমণি বৰুৱা, বৰষাৰাণী বিষয়া, বৰ্ণালী পূজাৰী, ইনু বৰুৱা, অংকুৰ বিষয়া, নিলয় গুপ্ত, নীৰেন শৰ্মা, অসীম বৈশ্য, উদয় শংকৰ আদিৰ লগতে নতুনকৈ অৱতোষ ভূঞা, পুণ্যদা হাজৰিকা, ভাৰ্গৰ গগৈ, পূজা ডেকা, সুদীপ্ত গোস্বামী, প্রত্যুষ প্লাবন, নীলিম কাঞ্চন চেতিয়া, ইভান শইকীয়া, ৰকিবুল আহমেদ, ৰিয়া বৰা, মিমাংশী বৰুৱা আদিকো দেখা যাব ছিকুৱেলত।