হোজাইত শিক্ষাখণ্ডৰ লজ্জাজনক অধ্যায়: প্ৰশ্নকাকত নহাৰ অজুহাতত বাতিল সপ্তম শ্ৰেণীৰ পৰীক্ষা

ডিজিটেল ডেস্কঃ ৰাজ্যৰ শিক্ষা ব্যৱস্থাক লৈ চৰকাৰে যিমানেই আস্ফালন নকৰক কিয়, এতিয়াও একাংশ বিদ্যালয়ৰ চৰম দায়িত্বহীনতাই ছাত্ৰ-ছাত্ৰীৰ ভৱিষ্যতক লৈ হেতালি খেলি থকাৰ তথ্য পোহৰলৈ আহিছে।

হোজাই জিলাৰ কেন্দুগুৰিৰ জনজাতি উচ্চ মাধ্যমিক বিদ্যালয়ত শেহতীয়াকৈ সংঘটিত এক আজৱ কাণ্ডই সমগ্ৰ জিলাখনতে তীব্ৰ প্ৰতিক্ৰিয়াৰ সৃষ্টি কৰিছে।

প্ৰাপ্ত তথ্য অনুসৰি, মঙলবাৰে আগবেলাৰ ভাগত বিদ্যালয়খনত সপ্তম শ্ৰেণীৰ অসমীয়া বিষয়ৰ পৰীক্ষা অনুষ্ঠিত হোৱাৰ কথা আছিল। ছাত্ৰ-ছাত্ৰীসকলে নিৰ্ধাৰিত সময়ত পৰীক্ষা দিবলৈ আহিছিল যদিও তেওঁলোকক জনোৱা হয় যে পৰীক্ষাৰ বাবে কোনো প্ৰশ্নকাকত বিদ্যালয়লৈ অহা নাই। ফলত পৰীক্ষা অনুষ্ঠিত কৰাৰ পৰিৱৰ্তে ছাত্ৰ-ছাত্ৰীসকলক বিদ্যালয়ৰ বাৰাণ্ডাতে অনাই-বনাই ঘূৰি ফুৰিবলৈ এৰি দিয়া হয়।

আটাইতকৈ চিন্তনীয় বিষয়টো হ’ল যে এনে এক গুৰুতৰ পৰিস্থিতিৰ পিছতো বিদ্যালয়ত উপস্থিত থকা শিক্ষকসকলে সমস্যাটো সমাধানৰ বাবে কোনো ধৰণৰ তৎপৰতা প্ৰদৰ্শন নকৰিলে।

এই বিশৃংখলতাৰ আঁৰত বিদ্যালয়খনৰ দীৰ্ঘদিনীয়া প্ৰশাসনিক বিফলতা নিহিত হৈ থকা বুলি অভিযোগ উঠিছে। বিদ্যালয়খনৰ প্ৰধান শিক্ষক ইন্দ্ৰপাল গোৱালা কিছুদিন পূৰ্বে দুৰ্নীতিৰ অভিযোগত কাৰাবাস খাটিবলগীয়া হৈছিল। জেললৈ যোৱাৰ পিছত তেওঁক নিলম্বন কৰা হৈছিল যদিও অভিযোগ অনুসৰি তেওঁ এতিয়ালৈকে কোনো শিক্ষক বা বিদ্যালয় পৰিদৰ্শকক আনুষ্ঠানিকভাৱে দায়িত্বভাৰ অৰ্পণ কৰা নাই। মুৰব্বীহীন বিদ্যালয়খনত বৰ্তমানৰ শিক্ষকসকলে নিয়াৰিকৈ কাম-কাজ চলোৱাত ব্যৰ্থ হৈছে, যাৰ প্ৰত্যক্ষ প্ৰভাৱ পৰীক্ষাৰ দৰে গুৰুত্বপূৰ্ণ বিষয়ত পৰিছে।

বিদ্যালয় কৰ্তৃপক্ষৰ এনে কাণ্ডজ্ঞানহীন কৰ্মক লৈ সচেতন মহলত তীব্ৰ প্ৰতিক্ৰিয়াৰ সৃষ্টি হৈছে। এতিয়া প্ৰশ্ন হয়, বিভাগীয় কৰ্তৃপক্ষই এইক্ষেত্ৰত কি ব্যৱস্থা গ্ৰহণ কৰিব? ছাত্ৰ-ছাত্ৰীৰ হেৰুওৱা সময় আৰু মানসিক চাপৰ দায়িত্ব কোনে ল’ব? স্থানীয় ৰাইজে শিক্ষা বিভাগক এই বিষয়ত তৎকালীনভাৱে হস্তক্ষেপ কৰিবলৈ আৰু দোষী শিক্ষকৰ বিৰুদ্ধে কঠোৰ ব্যৱস্থা গ্ৰহণ কৰিবলৈ দাবী জনাইছে।