ইতিহাস ৰচি প্ৰথমবাৰলৈ গুৱাহাটীত হ'ব টেষ্ট মেচ

ডিজিটেল ডেস্ক : ৭৬ বছৰৰ অসমৰ ক্ৰিকেট ইতিহাসত প্ৰথমবাৰৰ বাবে গুৱাহাটীত অনুষ্ঠিত হ'ব টেষ্ট মেচ। ভাৰতৰ বাবে অতি গুৰুত্বপূৰ্ণ হ'ব এই মেচখন। এই মেচখনে অসমৰ ক্ৰিকেটাৰক যথেষ্ট উৎসাহিত কৰিব। 

২২ নৱেম্বৰত গুৱাহাটীত অনুষ্ঠিত হ'বলগীয়া ভাৰত আৰু দক্ষিণ আফ্ৰিকাৰ টেষ্ট মেচৰ পূৰ্বে কালি বর্ষাপাৰাৰ এ চি এ স্টেডিয়ামত আয়োজিত এখন সংবাদমেলযোগে এই কথা সদৰী কৰে বি চি চি আইৰ সচিব দেৱজিৎ শইকীয়াই। 

ভাৰত-দক্ষিণ আফ্রিকাৰ মাজত অনুষ্ঠিত হ'বলগীয়া দ্বিতীয়খন মেচৰ বাবে প্রস্তুতি সম্পূর্ণ হোৱা বুলি উল্লেখ কৰি শইকীয়াই অসমৰ বাবে ঐতিহাসিক বিৱেচিত মেচখন ২২ নৱেম্বৰৰ পুৱা ৯ বজাত আৰম্ভ হ'ব বুলি জানিবলৈ দিয়ে। 

ৰাষ্ট্ৰীয় সংগীতেৰে আৰম্ভ হ'বলগীয়া মেচখনৰ বাবে স্টেডিয়ামৰ গে'ট মুকলি হ'ব পুৱা সাত বজাত। অসম তথা উত্তৰ-পূৰ্বাঞ্চলৰ বাবে গৌৰৱৰ বিষয়টো হ'ল- আমি প্রথমবাৰৰ বাবে টেষ্ট মেচ আয়োজনৰ সুযোগ লাভ কৰিছোঁ, সেইটো সম্ভৱ হৈছে আই চি চিৰ অধ্যক্ষ জয় শ্বাহৰ সদিচ্ছা তথা বদান্যতাৰ বাবে। গতিকে এই সুযোগতে শ্বাহক আন্তৰিক ধন্যবাদ জনাইছোঁ, শইকীয়াই লগতে কয়।