২১ জুলাইৰ পৰা সংসদৰ বৰ্ষাকালীন অধিৱেশন

ডিজিটেল ডেস্ক : কেন্দ্রীয় সংসদীয় পৰিক্ৰমা মন্ত্ৰী কিৰেন ৰিজিজুৱে ঘোষণা কৰে যে সংসদৰ বর্ষাকালীন অধিৱেশন ২১ জুলাইত আৰম্ভ হ'ব আৰু ২১ আগষ্টলৈ চলিব। ৰিজিজুৱে বুধবাৰে কয় যে স্বাধীনতা দিৱস উদযাপনৰ বাবে ১৩ আৰু ১৪ আগষ্টত সংসদৰ অধিৱেশন অনুষ্ঠিত নহ'ব।

তিনি মাহৰ বিৰতিৰ পাছত ২১ জুলাইৰ পুৱা ১১ বজাত দুয়োখন সদনৰে কাম-কাজ আৰম্ভ হ'ব। ইয়াৰ আগতে ৰিজিজুৱে জনাইছিল যে প্ৰতিৰক্ষা মন্ত্ৰী ৰাজনাথ সিঙৰ অধ্যক্ষতাত অনুষ্ঠিত সংসদীয় পৰিক্ৰমা বিভাগৰ কেবিনেট সমিতিয়ে সংসদৰ বর্ষাকালীন অধিৱেশনৰ দিনৰ প্ৰস্তাৱ কৰিছিল।

আগতে কৰা ঘোষণা মতে সংসদৰ বর্ষাকালীন অধিৱেশন ১২ আগষ্টত অন্ত পৰাৰ কথা আছিল। কিন্তু আণৱিক খণ্ডত ব্যক্তিগত খণ্ডৰ প্ৰৱেশকে ধৰি কেইবাখনো গুৰুত্বপূর্ণ বিধেয়ক উত্থাপন আৰু গৃহীত কৰিবৰ বাবে এতিয়া সংসদৰ বৰ্ষাকালীন অধিৱেশনৰ দিন এসপ্তাহ বঢ়াই দিয়া হৈছে। ইফালে সংসদৰ বর্ষাকালীন অধিৱেশনৰ আগত বৃহস্পতিবাৰে লোক সভাৰ অধ্যক্ষ ওম বিৰলাই সকলো দলকে সংসদৰ কাম-কাজত ব্যাঘাত জন্মোৱা কার্য হ্রাস কৰিবলৈ আহ্বান জনায়।

হাৰিয়ানাৰ গুৰুগ্ৰামত অনুষ্ঠিত নগৰীয়া স্থানীয় প্রশাসনৰ ৰাষ্ট্ৰীয় পৰ্যায়ৰ এখন সন্মিলনত অংশগ্ৰহণ কৰি বিৰলাই আৰু কয়, 'এয়া হৈছে পৰিৱৰ্তনৰ সময়। যদি আমি গণতন্ত্রক শক্তিশালী কৰিব লাগে আৰু গণতান্ত্রিক প্রতিষ্ঠানক জবাবদিহি কৰিব লাগে, তেন্তে আমি নিশ্চিত কৰিব লাগিব যাতে সংসদৰ কাম-কাজ সঠিক ধৰণে হয়।'