কাছাৰত ১৯ বছৰীয়া যুৱকৰ কৰুণ মৃত্যু ; মটৰ সংযোগ কৰি নদীৰ পৰা পানী তুলিবলৈ গৈ বিদ্যুৎস্পৃষ্ট হয় যুৱকজন

ডিজিটেল ডেস্কঃ কাছাৰ জিলাৰ উধাৰবন্দৰ খাসপুৰ এলেকাত সংঘটিত হৈছে এক মৰ্মান্তিক দুৰ্ঘটনা। নদীৰ পৰা মটৰ সংযোগ কৰি পানী তুলিবলৈ গৈ বিদ্যুৎস্পৃষ্ট হৈ এজন যুৱকৰ মৃত্যু হয়। মৃত যুৱকজনৰ নাম আকবৰ হোসেন। তেওঁৰ বয়স মাত্ৰ ১৯ বছৰ ।

ঘটনাৰ বিৱৰণ অনুসৰি, আকবৰ হোসেনে নদীৰ পৰা পানী তুলিবলৈ মটৰ সংযোগ কৰাৰ সময়তে হঠাৎ বিদ্যুৎপৃষ্ট হয় যাৰ ফলত ঘটনাস্থলীতেই গুৰুতৰভাৱে আহত হয় যুৱকজন।

ঘটনাৰ পিছতেই পৰিয়ালৰলোকে আকবৰক নদীৰ পৰা উদ্ধাৰ কৰি তৎক্ষণাত টিকল মডেল হাস্পতাললৈ লৈ যায়। তাত কৰ্তব্যৰত চিকিৎসকে অৱস্থা সংকটজনক বুলি উল্লেখ কৰি তেওঁক শিলচৰ মেডিকেল কলেজ হাস্পতাললৈ স্থানান্তৰ কৰাৰ পৰামৰ্শ দিয়ে।

কিন্তু দুৰ্ভাগ্যবশতঃ শিলচৰ মেডিকেল কলেজ হাস্পতাললৈ লৈ যোৱাৰ পথতেই আকবৰ হোসেনৰ মৃত্যু হয়। এই ঘটনাই সমগ্ৰ অঞ্চলত গভীৰ শোকৰ ছাঁ পেলাইছে।