ৰাজ্যৰ চাহ শ্ৰমিকক ভূমিপট্টা প্ৰদান কৰাক লৈ উৎফুল্লিত হৈ পৰিছে চাহ শ্ৰমিক আৰু সদৌ অসম আদিবাসী ছাত্ৰ সন্থা

ডিজিটেল ডেস্ক : স্বাধীনতাৰ পৰৱৰ্তী সময়ত ৰাজ্যৰ বিজেপি চৰকাৰে গ্ৰহণ কৰা এক সাহসী সিদ্ধান্তই আশাৰ বতৰা কঢ়িয়াই আনিছে ৰাজ্যৰ লাখ-লাখ চাহ শ্ৰমিকলৈ ৷ এটুকুৰা নিজা মাটিৰ সপোন দিঠক হোৱাৰ পথত চাহ শ্ৰমিকৰ । 

বিজেপি চৰকাৰৰ এই সিদ্ধান্তক লৈ বাগিছাই-বাগিছাই দেখা গৈছে চাহ শ্ৰমিকৰ মাজত আনন্দৰ লহৰ । চলিত বিধান সভাতে ৰাজ্য চৰকাৰে আনিছে দ্যা আছাম ফিক্সেচন অৱ চিলিং অন হ’ল্ডিংছ ( এমেন্টমেন ) বিল -২০২৫ ৷ এই আইনৰ অধিনত বাগিছাৰ শ্ৰমিকে লাভ কৰিব ভূমিপট্টা। 

একেই আনন্দ দেখা গ'ল ভেৰগাঁৱৰ ডিমাকুছি চাহ বাগিছাত। শ্ৰমিক সকলৰ দীৰ্ঘদিনীয়া দাৱীক চৰকাৰে মান্যতা দিয়াৰ লগে-লগে সমাধানৰ পথত ভূমিপট্টাৰ সমস্যা । স্বাধীনতাৰ পৰৱৰ্তী সময়ত কোনো এখন চৰকাৰে সমাধান কৰিব নোৱাৰা এটা সমস্যা বিজেপি চৰকাৰে সমাধান কৰাৰ বাবে এতিয়া চৰকাৰক ধন্যবাদ দিছে চাহ শ্ৰমিকৰ লগতে আদিবাসী ছাত্ৰ সন্থাই। 

ওদালগুৰিৰ আছা নেতা বাবুল পাইক আৰু কেন্দ্ৰীয় সমিতিৰ আছা নেতা ৰবিৰাম বাক্সে চৰকাৰৰ এই সাহসী সিদ্ধান্তক প্ৰশংসা কৰিছে । চৰকাৰক ধন্যবাদ দি আছা নেতা দুগৰাকীয়ে এই আইনৰ আওঁতাত যাতে প্ৰতিজন চাহ শ্ৰমিকে পৰ্যাপ্ত মাটিৰ পট্তা লাভ কৰিব পাৰে সেয়া নিশ্চিত কৰিবলৈ চৰকাৰক আহ্বান জনাইছে ৷ ইফালে দুই আছা নেতাই ২০২৬ ৰ বিধানসভা নিৰ্বাচনৰ পূৰ্বে ৬ জনগোষ্ঠীৰ লগতে আদিবাসী জনগোষ্ঠীৰ জনজাতিকৰণৰ বাবে অতি শীঘ্ৰে পুনৰবাৰ দাবী জনায় মুখ্যমন্ত্ৰীক।