ডিজিটেল ডেস্ক: এখন জৰাজীৰ্ণ কাঠৰ দলঙে জ্বলাকলা খুৱাইছে অঞ্চলবাসী ৰাইজক। বৰপেটা জিলাৰ নৱগঠিত চেঙাৰ সমষ্টিৰ অন্তৰ্গত প্ৰধানমন্ত্ৰী গ্ৰাম চড়ক যোজনা আঁচনিৰ অধীনত কালাইৰদিয়াৰ পৰা সুখোৱাৰঝাৰ সংযোগী পথৰ আলোপতি-খাটিয়ামাৰী বজাৰৰ গাতে লাগি থকা কাঠৰ দলংখন সুদীৰ্ঘ দিন ধৰি জৰাজীৰ্ণ হৈ পৰাত ৰাইজৰ যাতায়াতৰ বাবে ভয়াবহ বিপদ আৰু সমস্যাৰ সৃষ্টি হৈছে।
আলোপতি-খাটিয়ামাৰী বজাৰৰ গাতে লাগি থকা সূঁতি নদীৰ ওপৰত থকা কাঠৰ দলংখন বিধ্বস্ত হৈ পৰাত বিপজ্জনক হৈছে যাতায়াত ব্যৱস্থা। দলংখনেৰে কোনোমতে বাইক চলে যদিও চাৰিচকীয়া যান-বাহন চলাচলত অসুবিধাৰ সন্মুখীন হৈছে।
জৰাজীৰ্ণ দলংখন মেৰামতি আৰু পুনঃনিৰ্মাণ নকৰাৰ বাবেই যাতায়াতৰ ক্ষেত্ৰত দুৰ্ভোগ ভূগিবলগীয়া হৈছে কেইবাখন গাঁৱৰ ৰাইজে। শীঘ্ৰে জৰাজীৰ্ণ দলংখন মেৰামতি কৰাৰ লগতে উক্ত স্থানত এখন পকী দলং নিৰ্মাণ কৰিবলৈ স্থানীয় ৰাইজে লোক নিৰ্মাণ বিভাগৰ লগতে ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাক দাবী জনাইছে।
Continue Reading
